Estimáu/a collaciu/a, gracies por visitar el nuesu portal web.

Dende esti espaciu vas poder consultar información d'interés relativa a la organización del Conceyu, los servicios públicos, el conceyu y la nuesa ufierta turística; conocer l'actualidá diaria y facer cualquier trámite on line dende la nuesa see electrónica d'una manera áxil y cenciella.

Samartín del Rei Aurelio tien un pasáu vinculáu a la minería del carbón que dexó nel territoriu un estensu y valiosu patrimoniu industrial representáu en forma de bocamines, pontes y castilletes, que son parte de los recursos turísticos del conceyu xunto con dos referentes culturales perimportantes como son el Muséu de la Minería y l'Industria o'l Pozu Sotón. Amás, cuntamos con un paisaxe natural escepcional y una esquisita gastronomía tradicional na que destaquen los platos de les cebolles rellenes, los pimientos y los nabos.    

En clave económica vamos avanzando escontra l'afitamientu de los sectores tecnolóxicos y científicos, de la que fomentamos el sector servicios, nes sos variantes turística, comercial y hostelera, ya incentivamos l'asentamientu de nueves industries.   

Tenemos la suerte de cuntar con un activu texíu asociativu que collabora estrechamente nel desenvolvimientu sociocultural faciendo posible que Samartín del Rei Aurelio sía un conceyu vivu, dinámicu y abiertu a tolos que nos visiten en cualquier fecha del añu, y un llugar estupendu pa vivir, pa trabayar y pa esfrutar.  

Esperámoste equí colos brazos abiertos. Recibe un candial saludu.

Xosé Ramón Martín Ardines

Alcalde de Samartín del Rei Aurelio