Samartín del Rei Aurelio, como conceyu, ye bastante nuevu: fórmase en 1837 y garra’l nome del Rei Aurelio y del Santu Xacobéu francés San Martín de Tours. Pol mor de la veneración a esti santu pasaben munchos pelegrinos del país vecín al dir pa Santiago de Compostela. 

Los primeros restos que mos indiquen la presencia de vida humana nél alcuéntrense nel cordal que separa’l valle del Nalón con La Güeria Carrocera. Referímonos al dolmen qu’iguaren nel tercer mileniu e.C. en La Campa L’Españal, ente La Casilla y La Campeta. Nesta mesma zona, na lladera de trés salientes que llamen Los Cuetos, hai unos grabaos rupestres esquemáticos, dellos túmulos funerarios, una piedra grabada y trés esteles discoidees. Estos restos, en xunto a un hachu de piedra talláu procedente de La Escura (L’Entregu) que se conserva nel Museo Arqueológico Nacional confirmen el pasu de tribus de pastores nómades nel segundu mileniu e.C. 

La presencia continua d’habitantes nel conceyu nuestru pruébalo’l fechu de topar un hachu de bronce del tipu de talón con dos ases, d’ente l’añu 500 y el 1000 e.C.

De magar esa fecha, van ser los restos de castros descubiertos en conceyu, mesmo que la esistencia d’una calzada romana que baxaba del puertu Tarna pa contra’l valle'l Nalón, los que mos informen de la presencia humana nel territoriu.

Reinu d'Asturies

Los primeros datos que tenemos de l’Alta Edá Media correspuéndese cola época del Reinu d’Asturies, cuando’l Rei Aurelio treslladó la corte ente los años 768 y 774 a lo qu’anguaño ye Samartín, onde según cuenta’l Padre Carvallo “morrió d’enfermedá y sepultáronlu nel valle de Llangréu na Ilesia Samartín, a cuatro o cinco legües de la ciudá d’Uviéu, onde lu atayó la muerte y onde tenía la residencia principal”.

Tiense documentao la esistencia de nobles nomaos infanzones que teníen vínculos estrechos con esti territoriu, daquella perteneciente a Llangréu. Tovía queden restos de delles casones solariegues y escudos d’armes qu’atestigüen la presencia d’estes families, por exemplu les casones d’El Bravial, Lloreo, Llai o Carrocera.

Nel añu 1075 el conceyu pasó a depender de la xurisdicción eclesiástica del Obispu d’Uviéu, y nel añu 1581 convirtióse en Conceyu de realengu col derechu a mandar representantes a la Xunta Xeneral del Principáu.

Hai más cambios nel sieglu XIX, cuando, al amparu de la Constitución de Cádiz de 1812 y tres del pronunciamientu de Riego en 1820, los pueblos de Samartín del Rei Aurelio consiguen la segregación del Conceyu de Llangréu pasando a constituise como ayuntamientu independiente. Cola reacción absolutista de 1823, reintegráronlos otra vuelta nel Conceyu Llangréu hasta que, como pagu de la llealtá d’estos a Isabel II frente a los carlistes, establecióse l’Ayuntamientu de Samartín del Rei Aurelio en Sotrondio, el día 6 de xineru de 1837.