Blimea celebra las Fiestas Gastronómicas de Los Pimientos del 3 al 8 de diciembre - ayto-sanmartindelreyaurelio
Blimea celebra les Fiestes Gastronómiques de Los Pimientos del 3 al 8 d'avientu
SMRA. 30.11.21. Blimea celebra del 3 al 8 d’avientu les Fiestes Gastronómiques de los Pimientos Rellenos, declaraes d’Interés Turísticu Rexonal pol Principáu d’Asturies. Un total de seis restoranes del llugar y la rodiada van collaborar nunes xornaes gastronómiques con cincuenta años de tradición, acompañaes tol fin de selmana por un programa d’actividaes festives qu’organizó la sociedá de festexos Nuestra Señora de las Nieves cola collaboración del Ayuntamientu.
Fiel a una celebración culinaria que sobresal nel calendariu gastronómicu de la cocina asturiana tradicional, la hostelería local servirá estos díes un menú bien sabrosu compuestu por pimientos asaos o al fornu, rellenos de carne o bonitu, acompañaos d’una ración de callos, de segundu platu, y frixuelos de postre. Too ello acompañao con sidra o vinu.
Depués d’atropar los meyores productos de la tierra y la montaña, los restoranes van ofrecer el menú, mesmo nel almuerzu que na cena, a un preciu que varía según l’establecimientu pero que se mueve alredor de los 24 euros. Del mesmu mou, ofrezse la opción de pidir namás el platu de pimientos rellenos pa quien lo prefiera, como alternativa al menú completu.
Pimientu d'Oro
Les xornaes gastronómiques de los Pimientos Rellenos van acompañase tola ponte festiva d’un programa cultural y de fiestes qu’incluye la entrega del gallardón del Pimientu d’Oro a Raúl Castellanos Serrano, que se va facer el vienres a les 19 hores nel centru social de Blimea, en reconocimientu al so llabor como cabezaleru de la sociedá de fiestes que promovió los festexos principales que se celebraron en Blimea de magar l’añu 1986. El grupu Refaxu va allegrar l’actu col espectáculu Refaxu ensaya un villancicu.
A continuación, ronda del Grupu Folclóricu pelos bares y inauguración de la esposición fotográfica Los ojos del que mira, de José Fernández Gradín; y a partir de les 23,30 hores, verbena cola actuación de Grupo Límite y Asturdj.
Los actos continuarán tol fin de selmana y la ponte festiva. El mercáu de segunda mano, el conciertu de la Banda Música, la sesión vermú a cargu del artista Ún de Grao, el concursu pimientos, dellos talleres infantiles, amás del maratón de parchís y el I Troféu de Fútbol son les principales actividaes previstes, amás de les verbenes de la nueche’l sábadu y el domingu.