SMRA. 13.10.18. La Conceyalía d'Igualdá de Samartín del Rei Aurelio súmase güei a los actos de presentación en Casu de la Campaña del 25 de payares de los cinco conceyos del Nalón escontra la violencia de xéneru, onde van presentar el motivu "Si llega tarde, nun ye xusticia" y el sentíu del mesmu, amás de les actividaes que van desenvolvese en cada conceyu nos díes vinientes.

Tocantes a Samartín del Rei Aurelio, amás del espardimientu de los cartelos de la campaña per espacios públicos y en redes sociales, ta prevista la repartida de 20.000 serviyetes pelos establecimientos hosteleros del conceyu col mensaxe impresu "El silenciu ye mortal. Non ye non. Denuncia", pa dar visibilidá a la llaceria del maltratu machista y sensibilizar a la población.

Per otra parte, el día 26 de payares cellebraráse un plenu estraordinariu na Casa Conceyu onde va tener llugar la llectura y aprobación de la moción del Conseyu la Muyer sobre la violencia de xéneru. De siguío, na plaza Ramón y Cajal, l'alumnáu del Colexu San José va poner n'escena una performance sobre'l tema.

Los actos van siguir el día 27 a les 18 hores cola proyección, na Casa d'Alcuentru de les Muyeres, del llargumetraxe "La bicicleta verde", dirixida por Haifaa Al-Mansour, directora saudina y primera muyer en dirixir una película n'Arabia Saudí pese a la presión del so gobiernu. Al otru día, na xornada del 28, va proyectase la película "La mio memoria, el mio poder", sobre les "kalamari", como se conoz a les neñes de Nepal que venden los padres a families riques para malvivir como esclaves ensin salariu nin educación mientres décades.

Tres la proyección de dambos llargumetraxes, una voluntaria de la Cruz Colorada/Cruz Roja va cuntar la so esperiencia personal con muyeres que viven en países en víes de desenvolvimientu.

Per otru llau, cola imaxe de la campaña van editase 100 calendarios de 2019 que van repartise ente les asociaciones de muyeres y el públicu xeneral que s'allegue a los actos previstos.