08.10.18. Samartín del Rei Aurelio agospiará un mes, del 15 d'ochobre al 15 de payares, una campaña de reciclaxe promovida por Cogersa con un programa variáu d'actividaes que tien l'oxetivu d'afalar la participación de vecines y vecinos concienciándolos y sensibilizándolos p'algamar un modelu de sistema productivu más sostenible.

La campaña, empobinada a tola población, va arrincar con un Conseyu Escolar del Reciclaxe'l xueves 18 d'ochobre nel Teatru del Conceyu, onde van participar los escolinos de Samartín del Rei Aurelio amás de representantes del Ayuntamientu y el Consorciu, cola mira de ver la xestión de los residuos n'Asturies.

Los actos continuarán con acciones de formación pa tola población per parte de los escolinos de les escueles y institutos d'educación secundaria, que farán d'embaxadores del reciclaxe. Les actividaes van desenvolvese nes cais y places comerciales y nos mercaos selmanales de los tres nucleos urbanos. Al mesmu tiempo van buzonease folletos informativos peles viviendes del conceyu.

Cogersa tamién pondrá tres talleres de reciclaxe: "Compra triple erre", el martes 23 d'ochobre na Casa la Mocedá en Sotrondio; "Ente Teles", el 30 d'ochobre nel Centru Social de Blimea, y "Compostaxe en Casa", el 6 de payares na Casa la Cultura de L'Entregu.  Los talleres, pa adultos y con una duración d'hora y media, pondránse a les seis de la tarde, con un tope máximu de 25 alumnos que tienen qu'apuntase primero na Casa la Mocedá.

Per otra parte, el miércoles 7 de payares la "Caravana del Reciclaxe" acudirá al mercáu de L'Entregu a mou de puntu d'información col envís d'aclarar a la ciudadanía les duldes sobre la xestión de residuos y el reciclaxe.