16.10.18. El Festival de Curtiumetraxes Cinesán arrinca'l próximu domingu 21 d'ochobre con un actu inaugural que va tener llugar per vez primera nos cines Artesiete, en L'Entregu, entamando asina una selmana con una ufierta cinematográfica internacional que nun va dexar indiferente. La novedá nesta edición ye la exhibición triple y a diariu de los curtiumetraxes a concursu na estaya oficial nos centros urbanos de Blimea, Sotrondio y L'Entregu.

"Nesta edición hai que destacar la proyección de tolos curtios escoyíos a concursu, tanto na estaya oficial como na asturiana, nos cines de L'Entregu. Proyectaránse tamién dellos llargumetraxes, colo qu'esperamos atrayer a más públicu y ufiertar les meyores condiciones técniques pa la exhibición de los curtiumetraxes", esplicó la conceyala de Cultura, María Alonso.

Pero, amás, "descentralicemos a los trés centros urbanos les proyecciones, de manera que cada sesión podrá vese'l mesmu día, primero en Blimea, na Casona del Bravial; a media tarde na Casa la Mocedá, en Sotrondio, y a lo último, a les ocho, nos cines Artesiete en L'Entregu. D'esta miente queremos animar a los vecinos y vecines del conceyu a que disfruten de la programación y s'afayen pola proximidá", contestó.

Los curtios oficiales van exhibise de llunes a vienres nos escenarios mentaos, concentraos nuna sesión d'una hora de duración. Los trabayos escoyólos un xuráu espertu d'ente un total de 774 obres presentaes a concursu, procedentes de 39 países ente los que destaquen nacionalidaes del continente asiáticu anguaño na vanguardia cinematográfica.

Nesti sen, van proyectase curtios de China, India o Indonesia, pero tamién de Turquía, México, Brasil, Arxentina o Francia, amás d'España, de xéneros y temátiques variaes. En xunto, 25 obres.

Tocantes a los curtiumetraxes asturianos, son once los trabayos escoyíos nesta edición y van proyectase toos xuntos el domingu 28 d'ochobre a les 18,30 hores nos cines Artesiete. Son curtios de directores locales y de la comunidá autónoma, y tamién en dellos casos rodaos en llingua asturiana. Anguaño, como novedá, podrán vese mesmo nel Centru de Creación Escénica Carlos Novoa, de Llangréu.

Estayes paraleles

Dientro de la "Estaya Temática", per otru llau, el cine d¿horror foi'l xéneru escoyíu con trés películes a exhibir: "Slender Man", "La nueche de Halloween" y "Velees 2: Nueche de Hallowen". A esti apartáu sumemos el conocíu como "Homenaxe a ..." que, nesta ocasión, rinde homenaxe al cine americano anterior al códigu Hays cola proyección de les películes "El signu de la cruz", "Scarface, espantu del hampa" y "Nun soi nengún ánxel".

El Festival incorpora amás una estaya infantil coles películes "Peter Rabbit" y "Cocu", en sesión mañanera, los domingos 21 y 28 d'ochobre, respectivamente, nel  Teatru Municipal.

Coles mesmes, la estaya "Off Cinesán" ufiertará una esposición de programes antiguos de mano de los cines del valle del Nalón, na Casa la Mocedá, del 22 d'ochobre al 5 de payares, xunto a una charra sobre'l cine y la muyer: "Estereotipos de los personaxes femeninos nel cine d'horror".

La clausura del festival cola entrega de premios va tener llugar el sábadu 3 de payares, nel Teatru Municipal, conducida polos integrantes de la compañía Higiénico Papel.