Un total de 774 obres procedentes de 39 países de los cinco continentes fueron presentaes al Festival Internacional de Curtiumetraxes CINESÁN que se va celebrar en Samartín del Rei Aurelio del 21 al 31 d'ochobre, en delles sedes: Teatru Municipal, la Casa la Mocedá, la Casona'l Bravial y los Cines ArteSiete.

Les películes presentaes vienen de tolos rincones del mundu: Canadá, EE.XX. o América Llatina; lo mesmo que d'Europa, de países como Francia, Reinu Xuníu, Alemaña, Italia, Grecia o Dinamarca;  y del restu del mundu como por casu d'Arxelia, Turquía, Cazayistán o Filipines. Destaca tamién la participación de países asiáticos anguaño a la vanguardia cinematográfica como Irán, India, China, Corea del Sur y Xapón.

D'ente tolos trabayos presentaos, un xuráu paritariu, compuestu pol productor de cine Jaime Gona, la directora audiovisual Melania Fraga, el director Fran Longoria y la profesora de la Universidá d'Uviéu Emma González, va realizar una escoyeta que va pasar al concursu de curtiumetraxes nes estayes Oficial y Curtios Asturianos, con premios respeutivos de 1.000 y 400 euros pal meyor curtiumetraxe de cada estaya, a los qu'hai que sumar un premiu a la meyor interpretación por valor de 600 euros. Los curtios oficiales van proyectase de llunes a vienres, con una duración ensembre d'una hora por sesión.

El festival tendrá otres dos estayes paraleles: Estaya temática,  pa la proyección de películes de cualquier dómina que tengan de mancomún un mesmu xéneru, que nesta edición definióse que sía'l cine d'acción; y Homenaxe a...  que se va dedicar esta edición al cine pre Códigu Hays.

De terceres, el festival inclúi la realización d'actividaes complementaries al rodiu del mundu del cine que se engloben sol epígrafe Off-CINESAN. Conferencies, proyecciones, conciertos o cursos son dellos exemplos de los conteníos d'esti apartáu que vien desenvolviéndose mientres tol añu.

Repite per segundu añu la sección Cinesán Infantil, pa'l públicu menudo, cola proyección de dos llargumetraxes, nel Teatru, con palombines y bebida de baldre para tolos neños y neñes qu'alleguen.

La gala de clausura y entrega de premios va tener llugar el 3 de payares nel Teatru Municipal, en L'Entregu.