SMRA. 17.11.21. L’Ayuntamientu de Samartín del Rei Aurelio arrancará’l llunes el programa Joven Ocúpate, el Plan Local d’Empléu y el Programa de Contratos en Práctiques, qu’en conxuntu sumen un total de 61 contrataciones temporales y 867.000 euros d’inversión.

El programa d’empléu y formación Joven Ocúpate, con una duración de nueve meses, supunxo la contratación 39 paraos/es d’ente 16 y 29 años, trés monitores y trés mentores -en total 45 persones- per mediu d’una subvención de 507.000 euros del Serviciu Públicu d’Empléu del Principáu d’Asturies.

El programa desarrollaráse al través de trés módulos colos que se van poder consiguir los certificaos de profesionalidá d’Actividaes Auxiliares de Conservación y Meyora de Montes, que los/es habilita como peones forestales; Llimpieza d’Espacios Abiertos y Instalaciones Industriales, esto ye, barrenderos/es; y Llimpieza de Superficies y Moblame n’Edificios Locales, ye dicir, llimpiadores.

El Plan Local d’Empléu tien una duración d’un añu. Al través de la modalidá de práctiques seleccionóse un axente de desarrollu local, un responsable d’atención al cliente y/o usuariu, un técnicu informáticu, trés ordenances, trés telefonistes y trés peones forestales.

Al empar, tamién el llunes, empezará’l programa de Contratos de Trabayos en Práctiques, pa xente mozo inscrito nel sistema de Garantía Xuvenil, que permitirá contratar a un arquitectu, un trabayador social y dos alministrativos, tamién pal periodu d’un añu. En dambos programes la financiación vien d’una subvención concedida per parte la Conseyería d’Industria, Empléu y Promoción Económica de 250.000 y 110.000 euros, respectivamente.