SMRA. 04.05.21. L'Ayuntamientu de Samartín del Rei Aurelio entamó'l repartu de compostadores a les 39 persones que s'inscribieron na undécima campaña de compostaxe domésticu que se punxo en marcha en collaboración con Cogersa p'afalar la tresformación de residuos orgánicos y de siegues en compost destináu al abonu de xardines y güertes.

Les persones que participen nesta campaña tienen hasta'l día 10 de xunu para recoyer la compostadora nel almacén municipal, asitiáu en La Hullera en Sotrondio, n'horariu de mañana. Primero recibieron una charra formativa al respective.

La campaña recibió una bona respuesta per parte principalmente de vecinos que son propietarios d'una segunda vivienda na estaya rural, asina como de vecinos nuevos qu'asitiaron nos pueblos.

A la vuelta del veranu, l'Ayuntamientu va realizar un siguimientu de la campaña nuna segunda xornada técnica pa evaluar les muestres de compost que s'obtuvieron.

La participación nestes campañes qu'organiza Cogersa tien como finalidá apostar pol desendolque caltenible, fomentando toa triba de práctiques de reciclaxe y de reutilización, siendo'l compostaxe una fórmula cenciella y doméstica de curiar pol mediu ambiente al tiempu que mos proporciona un abonu mui útil pal campu.