29.10.18. El curtiumetraxe "Uno", del director Javier Marco Rico, foi escoyíu ganador de la estaya oficial del festival internacional de curtiumetraxes Cinesán, fallu del xuráu que fizo públicu la conceyala de Cultura, María Alonso, esti mediudía na Casona del Bravial, en Blimea. Na estaya asturiana, el curtiu premiáu foi "More like a feeling", de la directora María Barton, mentantu'l galardón a la meyor interpretación recayó na actriz Laura Galán pol so papel nel curtiu "Cerdita".

La entrega de los galardones va tener llugar el próximu sábadu 3 de payares a les 19:30 hores nel Teatru Municipal. La gala, que va tar conducida pola compañía de teatru Higiénico Papel, promete rises y entretenimientu, amás de la proyección de los curtiumetraxes premiaos. P'asistir ye necesario recoyer una invitación previa nel departamentu municipal de cultura na Casa Conceyu.

Tres la exhibición na última selmana de los curtiumetraxes, el Festival sigue con delles estayes más, como la "Estaya Temática", dedicada al cine de miéu con trés llargumetraxes que van poder vese güei llunes (Slender Man), mañana martes (La Nueche de Halloween) y el miércoles (Velees 2) nos Cines Artesiete a les 20 hores, siendo la entrada de baldre.

De la mesma manera, mañana martes los curtiumetraxes de la sección asturiana van poder vese nel Centru de Creación Escénica Carlos Álvarez Novoa, en Llangréu, con una cartelera compuesta por once curtios ente los que figura'l premiáu pol xuráu.

Tocantes a la estaya "Homenaxe al cine americanu anterior al Códigu Hays", güei llunes va proyectase la película "Scarface, espantu del Hampa" a les seis de la tarde na Casa la Mocedá, en Sotrondio; y mañana martes, a la mesma hora y nel mesmu llugar, va proyectase "Nun soi un ánxel".

Otru de los actos previstos pa esta selmana enantes de la gala de clausura ye la charra sobre cine y espantu "Estereotipos de los personaxes femeninos nel cine de miéu", al cargu de la profesora de la Universidá d'Uviéu Elena Avanzas, el miércoles 31 d'ochobre a les 18 hores na Casa d'Alcuentros de les Muyeres. Amás, y hasta'l 5 de payares, la Casa la Mocedá abelluga la esposición "Antiguos Programes de Mano de los Cines del Valle del Nalón", que pue visitase de llunes a vienres n'horariu de mañana y tarde.