SMRA. 19.05.21 Espaciu La Plaza, en Sotrondio, agospia dende güei la esposición "Bocetos de la mina y los mineros", una serie d'esbozos iguaos con llapiceru y carbon por Luis Felipe Capellín, sindicalista reconocíu y autor prolíficu de documentales, arriendes de columnista y dibuxante, que relaten histories sobre'l pasáu minieru. La muestra puede visitase de martes a sábadu hasta'l 30 de xunu.

En pallabres del autor, "los bocetos busquen suxerir histories venceyaes a una minería que se va desaniciando, onde los castilletes qu'antañu yeren símbolu de vida y riqueza anguaño recuérdennos los suaños de los nuestros antepasaos por una vida meyor, pero tamién el duelgu y la muerte".

La esposición, que rinde un homenaxe particular a los mineros y mineres y a les sos families, retrata a carboneres y mineros nel tayu, castilletes y pozos, protestes de trabayadores y otres escenes cotidianes que retraten una domina de la nuestra historia recién.

Luis Felipe Capellín, vinculáu dende l'adolescencia col movimientu social, cultural y políticu, foi iguando, a lo llargo de la so vida una sólida trayectoria nel ámbitu cultural, con más de mil artículos publicaos en prensa, y una bayurosa producción documental de cine social recoyida en 65 trabajos.