Fiestas de Los Nabos - ayto-sanmartindelreyaurelio
Sotrondio celebra Les Fiestes Gastronómiques de Los Nabos del 9 al 12 de payares
SMRA.29.10.18 La localidá de Sotrondio celebra del 9 al 12 de payares les Fiestes Gastronómiques de Los Nabos, declaraes d'Interés Turísticu Rexonal, n'una docena d'establecimientos de la localidá que van sirvir el tradicional menú compuestu por pote de nabos, ración de callos y casadielles. La xornada gastronómica cuenta con un variáu programa de fiestes pa tol fin de selmana que cuerre al cargu de la sociedá de festeyos San Martín de Tours, cola collaboración de la Casa Conceyu.
El platu, un clásicu de la hostelería local dende los años 70, tien como base un productu de la tierra qu'abonda na seronda como son los nabos, que torna en manxar de la mesa con un compangu de primera calidá a base de chorizu, morciella, tocín y carne de gochu. Cocinao too ello a poco fueu mientres un par d'hores, da nun sabrosu potaxe ideal pa esta estación del añu.
Los chigres van sirvir el menú tanto na xinta como na cena, a un preciu que bazcuya llixeramente d'un establecimientu a otru, pero que ta alredor de los 25 euros. Dada l'abondosa llegada de comensales, encamiéntase acutar mesa con antelación en dalgún de los locales, nos teléfonos que se puen consultar nel siguiente enllaz: "ÓNDE COMER" https://www.smra.org/sidrerias
Concursu de cocina, mercáu tradicional, teatru, actividaes deportives, carrera de cintes a caballu, cantar asturianu, actuaciones musicales y les populares verbenes les nueches del vienres y el sábadu, amás de la sesión vermú el domingu, componen un programa festivu pa esfrutar en familia y con amigos mientres un llargu fin de selmana que s'estiende hasta'l llunes 12 de payares, festividá local en Sotrondio y na vecina localidá de Blimea. Toles activiades al detalle puen consultase nel documentu axunto qu'apaez más embaxo.
La distinción del Nabu d'Oru, que concede la Sociedá de Festeyos San Martín de Tours, foi nesta edición pa Ángel Rodríguez Suárez, "Gelín el municipal", pola so implicación activa nel movimientu asociativu de la localidá. Collabora davezu cola Sociedá de Festeyos y el Club d'Atletismu Valle del Nalón, y ye miembru de l'asociación cultural Los Pataqueros y la Banda de Música de Samartín, amás de presidir la sociedá Cabalgata de Reis.
