21.10.21. Les escueles de 0-3 años de Samartín del Rei Aurelio van ser gratuites dende esti cursu escolar pa tolos/es usuarios/es que tean empadronaos/es en conceyu, lo que lu convierte nel primeru d'Asturies n'aplicar esta midida universal. La Comisión de Cultura dio'l preste por unanimidá a les bases que van subvencionar dafechu'l preciu públicu.

La subvención del cien por cien del costu del serviciu a la xente empradonao tien como oxetivu principal asitiar población en conceyu, fomentar les matriculaciones y contribuir a la conciliación de la vida familiar y llaboral, amás de sirvir como incentivu pa la busca d'empléu o la formación de los/es proxenitores.

Na actualidá, un total de 52 alumnos y alumnes, tán inscritos/es nes escueles infantiles del conceyu. En concreto, 32 na de Sotrondio y 20 na de L'Entregu, casi too xente empadronao en conceyu.

No tocante al preciu pol serviciu d'Escuela Infantil de 0-3 años, la cuota máxima al mes ye de 161 euros pa la xornada completa, y de 88 euros pa la media xornada, magar que yá hai families lliberaes del pagu de la cuota, d'acuerdu col baremu económicu, y otres que disfruten de bonificaciones nel preciu. A partir d'agora, la gratuidá va estendese a la totalidá de los/es usuarios/es que seyan residentes.

L'acuerdu va ratificase nel plenu que se celebrará'l 28 d'ochobre y la midida va entrar n'usu con carácter inmediatu.