SMRA. 08.06.21. El Muséu Mundu 3D allugáu nel Centru TIC de L'Entregu torna a abrir les puertes al públicu dende esta selmana p'amosar pente medies d'hologrames y otres técniques fotográfiques d'última xeneración un colección única que recrea delles de les xoyes del patrimoniu cultural y artístico nacional ya internacional.

El Muséu, inauguráu en xineru del añu pasáu, tuvo que suspender les visites al públicu a los dos meses d'abrir, a cuenta del andanciu de COVID, talamente como ocurrió col MUMI o'l Pozu Sotón, que fai poco recuperaron la so actividá ordinario.

"Vímonos obligaos a interrumpir les visites qu'al pocu tiempu de qu'abriere'l muséu suscitaran un gran interés pela parte del públicu non solo de la rexón, sinon d'otres provincies, como Madrid, y del estranxeru; polo qu'agora tornamos con ilusión a reabrir", desplicaron fontes del CINN.

Cola vuelta a la normalidá, el muséu reabre al públicu los martes y los xueves, de 11 a 13 hores, con reserva previa, a traviés del mail museo3d@cinn.es o llamando al teléfonu 985 733 644, pa grupos reducíos d'un máximu de seis persones, cola posibilidá d'aumentar el númberu  y los horarios a medida de que la contención del andanciu vaya avanzando.

Allugáu nes dependencies del Centru d'Investigación en Nanotecnoloxía y Nanociencia (CINN), esti museu constitúi una iniciativa pionera a nivel internacional qu'aspira a convertise nun referente de la divulgación de les tecnoloxíes 3D nel ámbitu de la cultura a traviés de reproducciones impresionantes qu'afalamos a toos pa que les visiten.

Mundu 3D tá distribuyío en tres estayes venceyaes ente sí: holografía aplicao al patrimoniu, holografía artístico y zona d'audiovisuales y pantalles interactives, onde se recreen grandes obres artístiques como la escultura de la Dama d'Elche o'l monumentu prerrománicu de Santa Cristina de L.lena, xunto con obres icóniques como "Still Life", de Lon Moore, o la reproducción de la Caxa de les Ágates, donada nel añu 910 a la Catedral de San Salvador, d'Úviéu.