10.10.18. Nueve agrupaciones y grupos de conservatoriu d'Asturies, Lleón y Galicia daránse cita nos 22 Alcuentros cola Música, organizaos pol Coru San Andrés Sergio Domingo, a celebrase nel Teatru Municipal de Samartín del Rei Aurelio, en L'Entregu, los díes 13 y 20 d'ochobre, a les 19,30 hores.

La sociedá coral promotora d'esti festival, representada por Jesús Montes Sanzo y Carlos Morilla, presentó esta mañana'l programa na Casa Conceyu, acompañada pol alcalde de Samartín del Rei Aurelio, Enrique Fernández.

Los conciertos na primera de les xornaes, el sábadu 13 d'ochobre, tarán al cargu del Conservatoriu Municipal de Mieres, de la mano de La Bandina (Javier Tejedor); la Coral Polifónica de Cangas de Narcea; el Conservatoriu de Música Valle del Nalón, representáu pol Coru Voblaninas, y  la Coral Eixil, de Cedeira (Galicia), amás de los anfitriones: el Coru San Andrés Sergio Domingo.

El segundu día de conciertu, el 20 d'ochobre, actuará'l Conservatoriu Profesional de Música de Xixón, cola Little Band; el Coru Luis Quirós, de Xixón; el Conservatoriu Municipal Profesional Julián Orbón, d'Avilés, con un cuartetu de vientu; y la Coral Vegazana, de Lleón, acompañaos polos organizadores d'esta cita musical.

Los Alcuentros cola Música de Samartín del Rei Aurelio tienen la singularidá d'axuntar nun mesmu festival a grupos corales y agrupaciones musicales de los conservatorios asturianos y d'otros llugares del territoriu nacional, que converxen nuna fusión d'estilos y xéneros musicales.

Ocasiones como ésta sirven pa reforzar llazos culturales ente les agrupaciones musicales participantes y contribúin a esparder el patrimoniu musical asturianu, clásicu y popular. Al mesmu tiempu, son una fonte de promoción del conceyu fuera de les nuestres llendes y dan-y puxu a l'actividá social y cultural nel territoriu propiu.