11.12.18. El Conceyu de Samartín del Rei Aurelio va poner en marcha primero de fin de mes el Programa de Formación y Empléu Mozu Ocúpate empobináu a contratar 24 alumnos, dos monitores y dos mentores col envís de realizar xeres de llimpieza n'espacios abiertos y n'instalaciones industriales, amás de llabores auxiliares de caltenimientu y meyores de montes, per un plazu d'execución de seis meses.

El programa supón "el desenvolvimientu d'acciones de formación y empléu que-yos permitan, a les moces y mozos con torgues especiales pal insertamientu llaboral, el llogru d'una formación que los cualifique profesionalmente y-yos facilite competencies clave, amás de l'alquisición d'habilidaes pal so insertamientu nel ámbitu llaboral, ameyorando les sos capacidaes, dotándolos d'una mayor disposición pa encarar xeres y trabayos y afalando actitúes positives que xeneren bon ambiente de trabayu, iniciativa, interés y enfotu pa la superación", desplicó'l conceyal d'Empléu, Honorino Montes.

Añedió tamién que "la motivación del colectivu ha ser una de les pilastres esenciales del programa, una y bones l'ésitu depende fundamentalmente de que los mozos tengan retos personales y compromisos nuevos con una posición proactiva". Al términu del programa los alumnos van llograr un certificáu de profesionalidá de nivel 1 nes ocupaciones de peón forestal y barrenderu.

El programa va empobináu al colectivu de mozos desemplegaos mayores de 16 y menores de 30 años que s'atopen inscritos nel ficheru del Sistema Nacional de Garantía Xuvenil. El plazu pa presentar la solicitú nel Rexistru del Conceyu remata'l próximu xueves día 13. Tola información al detalle sobre esta convocatoria pue consultase na sede electrónica del portal web del Conceyu: www.smra.org.