SMRA. 25.09.18. La oficina de Normalización Llingüística de Samartín del Rei Aurelio, con sede na Casona del Bravial, en Blimea, reabre les sos puertes al públicu'l 1 d'ochobre coles mires de volver a entamar les actividaes de promoción del asturianu y normalizar el so usu na vida social del conceyu. La traducción al asturianu de los conteníos del Portal Web del Conceyu ye una de les primeres xeres coles que va arrincar el serviciu.

La oficina va tar abierta los llunes y miércoles, de diez de la mañana a una de la tarde; y los martes y xueves, de seis de la tarde a nueve de la nueche. Los vecinos y asociaciones del conceyu que lo deseyen van atopar nesta sede un espaciu onde solicitar asesoramientu, treslladar suxerencies, informase sobre subvenciones o cursos o participar nes distintes iniciatives d'espardimientu del asturianu que vaigan entamase, como campañes, esposiciones o celebraciones culturales, ente otres.

Recuperar el funcionamientu de la páxina en Facebok de la Oficina de Normalización Llinguística, renovar les collaboraciones cola rede d'oficines d'Asturies y traducir al asturianu les notes de prensa que s'unvíen a los medios de comunicación formen parte tamién de la llínea de trabayu que se diseña pa los próximos meses.

La oficina de normalización dará-y puxu, per otru llau, a l'actividá cultural propia de la Casona del Bravial, onde s'entamen de manera habitual actos culturales, como presentaciones de llibros, charres o actividaes con escolinos.