SMRA. 17.07.21.  La Conceyalía d'Igualdá va conmemorar el Día del Arguyu Gai dando visibilidá al colectivu LGTBI+ y reivindicando respetu a la diversidá y orientación sexual pente medies d'estremaos actos simbólicos y actividaes que se van desendolcar nes selmanes prósimes.

D'esta miente, va llantase una señal en Sotrondio, onde se declara a Samartín del Rei Aurelio como conceyu amigu del colectivu, baxo¿l nome de "Ye hora de tener derechu a una vida ensin etiquetes", que s'amesta a les que se colocaron a finales de 2020 en L'Entregu y Blimea. Tamién va colingase un llazu colos colores del arcu la vieya na fachada de la Casa del Conceyu, que arriendes va iluminase la nueche del 28 de xunu.

Per otru llau, la Conceyalía d'Igualdá va organizar el Taller "Orgullo y mucho prejuicio. Historia del movimiento LGTBI+ desde una perspectiva de la violencia de género", el 23 de xunu, de 17 a 19 hores, na Casa d'Alcuentros de les Muyeres, organizáu pol colectivu Xega. Les inscripciones pueden realizase nel númberu 985 65 76 30, n'horariu de mañana, de llunes a vienres.

Esti taller vien precedíu pola charla que se celebró esti mes, a traviés de l'Asociación Mujeres del Carbón en Lucha, respectu a los roles de xéneru y la diversidá sexual, impartida por Xega, cola collaboración municipal.

Tamién tá previsto presentar nel plenu municipal de xunu una moción conxunta de tolos partíos políticos,  reivindicativa de los derechos del colectivu LGTBI y reeditar nes redes sociales la campaña "Respeta quien soi, respeta a quien amo" en favor de la diversidá sexual y pola llibertá y orientación sexual de les persones.