03.12.18. La localidá de Blimea celebra del 6 al 9 d'avientu les populares Fiestes Gastronómiques de los Pimientos Rellenos, declaraes d'Interés Turísticu Rexonal pol Principáu d'Asturies.  Media docena de restoranes van participar nestes xornaes gastronómiques, con más de cuarenta años de tradición, agasayaes con un programa d'actividaes festives mientres tola fin de selmana.

Fiel a una celebración culinaria que rescampla nel calendariu gastronómicu de la cocina asturiana tradicional, la hostelería local va sirvir estos díes un sabrosu menú compuestu por pimientos, tostaos o al fornu, rellenos de carne o bonitu, y acompañaos d'una ración de callos, de segundu platu, y frixuelos, de postre; too ello regao con sidra o vinu.

Atropando los meyores productos de la tierra y el monte, los restoranes de Blimea y contorna van ufiertar el menú tanto na xinta como na cena, a un preciu que varía según l'establecimientu, pero que se mueve en redol a los 22 euros per persona. Ufiértase tamién la opción de pidir individualmente'l platu de pimientos rellenos pa los que lo prefieran como alternativa al menú completu. Independientemente d'una o otra opción, encamiéntase acutar mesa primero en dalgún de los restoranes participantes: Crespos (985 672 588), El Curru (985 671 594), El Miramar (660 27 47 54), Pepe Luis (985 670 034), El Rinconín de Xuan (666 844 810) y San Mamés (985 670 604).

Pimientu d'Oru

Les xornaes gastronómiques de los Pimientos Rellenos van tar animaes mientres tola ponte festiva por un programa cultural y de fiestes qu'entama l'Asociación de Festeyos La Nuesa Señora de les Nieves en collaboración col Conceyu. Amás d'esfrutar de la excelencia de les cocines hosteleres, les places y centros culturales de la localidá van acoyer actividaes pa tolos públicos. Pal vienres ta prevista la llectura del pregón de les fiestes, a les 19,00 hores, nel centru social. El pregón va tar al cargu de los nuevos futbolistes arxentinos Brandon Quintana y Nachu Albornoz, acoyíos en Blimea pola solidaridá de los sos vecinos y pa los que se va entamar el mesmu día in situ una recoyida d'alimentos.

De siguío va facese entrega del galardón Pimientu d'Oru, que nesta edición recái na xerente y pastelera de la Confitería Casa Ulpiano dende 1960, Ernesta García Suárez, al mandu d'ún de los locales hosteleros más antiguos de la localidá.

Pal restu de díes festivos, el programa ufierta actuaciones musicales, teatru, talleres infantiles, competiciones deportives o'l concursu de pimientos rellenos pa particulares y profesionales. Va haber, tamién, conciertos y verbenes al cargu de la orquesta Grupu Planet, la nueche del vienres, y Grupo Beatriz, el sábadu. Tola información festiva al detalle puede consultase na web municipal smra.org.