SMRA. 01.02.21. L'Ayuntamientu de Samartín del Rei Aurelio incorporó güei a cinco axentes de la Policía Llocal en práctiques que demientres los próximos meses van tener que superar un cursu teórico-prácticu que-yos permita la so toma de posesión como funcionarios de carrera'l 1 de xunetu.

Los cinco axentes superaron con ésitu la primer parte de la oposición, esto ye, l'esame de conocimientos y les pruebes físiques, y agora tienen qu¿aprobar un cursu de formación teórico na Escuela de Seguridad del Principado de Asturias, nesti primer semestre del añu, y realizar les correspondientes práctiques selmanales nel conceyude Samartín.

Na xornada de güei, los axentes nomáronse como funcionarios en práctiques pol alcalde en funciones, Honorino Montes, al tiempu que roblaron la toma de posesión correspondiente, nun actu onde también tuvo presente'l Xefe de la Policía Llocal, Enrique Suárez.

Les places nueves d'axentes de la Policía Llocal qu'agora se cubren correspuenden a la Ufierta Público d'Empleu del Ayuntamientu de Samartín del añu 2018 y tienen como oxetivu cubrir les baxes por xubilación o treslláu que vienen asocediendo nos caberos años na plantía policial.

Con esta nueva dotación de personal va reforzase y optimizase'l serviciu de seguranza ciudadano, tráficu y tolos que desempeña la Policía Llocal davezu, al tiempu que s'anova la plantía.

Arriendes d'estos axentes, la Ufierta Público d'Empléu de 2020 contempla otres dos places nueves que'l procesu de convocatoria espera poder entamase a lo llargo d'esti exerciciu.