SMRA. 20.01.21. La Conceyalía de Cultura de Samartín del Rei Aurelio tornó al asturianu'l portal web municipal smra.org compuestu por conteníos fixos con información sobre los servicios públicos y el funcionamientu de la institución asina como por noticies d'actualidá municipal.

El procesu de torna de la web al asturianu "nun ye concluyente sinon que va siguir nel tiempu pues tien que s'entender nel marcu de la  tresformación dinámico del propiu portal web, onde se revisen, renueven y amesten conteníos periódicamente", esplicó la conceyala de Cultura, María Alonso.  Con esti llabor "tratamos de  normalizar, potenciar y fomentar l'usu del asturianu ente la población del conceyu", argumentó la edil.

L'accesu a los conteníos  n'asturianu ye  mui cenciellu y actívase calcando na bandera d'Asturies qu'aparez na parte superior izquierda del portal web na dirección smra.org, tantu si la conexón se fai dende un ordenador como d'un dispositivu móvil o tablet.

 A partir d'ehí, tantu los conteníos de les diferentes estayes que s'organiza el portal web como'l bloque de noticies qu'aparez de manera destacada na portada van poder lleese en llingua asturiana; inda non nel portal de tresparencia, entá en procesu de dotación de conteníos, que va entamase nuna siguiente fase.

La traducción del portal web al asturianu iguóse con recursos propios y personal municipal, y nun acarrió nengún coste.