Programación 25N Día Internacional contra la Violencia de Género - ayto-sanmartindelreyaurelio
Programación 25N Día Internacional contra la Violencia de Xéneru
SRA15.11.21. La Conceyalía d'Igualdá del Ayuntamientu de Samartín del Rei Aurelio ta acabante arrancar el programa d'actos conmemorativos del 25N, Día Internacional de la Eliminación de la Violencia contra la Muyer, qu'abarca talleres, charles y dellos actos cargaos de simbolismu, amás d'un videu pal que se contó cola collaboración de les Asociaciones de Muyeres. El repartu d'un millar de bolses del pan rotulaes contra la violencia de xéneru ye una de les actividaes previstes, xunto a la concentración ciudadana con paragües moraos o l'alcuentru moteru de condena de les agresiones de xéneru.
Les panaderíes locales van recibir bolses del pan feches de papel ilustraes con lema "San Martín dice NO a la violencia machista" que repartirán ente la vecería pa visibilizar ente la población esta lacra social, condenar el maltratu y fomentar una conciencia ciudadana crítica.
Esta actividá va tener llugar el 25 de payares, fecha na que se celebrará una concentración ciudadana na plaza Ramón y Cajal que, provista de paragües moraos a cargu de la Conceyalía d'Igualdá, va llanzar un mensaxe d'apoyu a les víctimes de violencia machista. Ente la población del conceyu van distribuise 300 paragües de color morao que lleven estampada la numberación 016, d'atención a les víctimes, col aquel de recalcar la esistencia d'esti serviciu d'información asesoramientu y atención psicosocial no tocante a violencia de xéneru.
Amás, en collaboración cola conceyalía d'igualdá de Mieres, el 21 de payares va tener llugar un alcuentru moteru na plaza l'Ayuntamientu baxo'l lema "Haz ruido contra la violencia machista" pa llamar l'atención sobre esti problema.
Taller d'asediu na calle, charles y la instalación d'un contador nel Ayuntamientu pal rexistru de les víctimes de la violencia de xéneru nutren el programa xunto a un spot nel que participaron representantes del movimientu social nel que se llama a la unidá ente homes y muyeres p'actuar contra'l maltratu.
Per otra parte, na programación d'esti añu cobra un papel relevante una sección qu'implica al deporte como disciplina dende la que combatir y prevenir la violencia de xéneru dende edaes tempranes trabayando la educación en valores como'l respetu, la igualdá o la comunicación asertiva na infancia y na adolescencia.
Nesti sentíu, el programa contempla exhibiciones deportives de defensa personal, halterofilia, zumba y atletismu; dos partíos de fútbol mistos; una marcha ciclista y a pie'l día 25 ente Blimea a L'Entregu; o la entrega d'una distinción a la Escuela de Fútbol de Iniciación San Martín pol so llabor en favor de la igualdá de xéneru.
A continuación axúntase un documentu col calendariu d'actividaes programaes.