24.08.18. El puntu llimpiu de Samartín del Rei Aurelio que se ta construyendo en Miera Baxo va entrar en funcionamientu a principios del próximu añu, según anunció esta mañana'l xerente de Cogersa, Santiago Fernández, cuando visitó'l llugar acompañáu pol alcalde del conceyu, Enrique Fernández Rodríguez.

Les nueves instalaciones, presupuestaes en 440.000 euros, van dar un serviciu bien importante al conceyu pa la recoyida de restos tanto domésticos como industriales y son una alternativa afayaíza pa la xestión de los mentaos restos, o borrafes, que va influyir n'un amenorgamientu de los vertideros pirates.

La puesta en marcha del puntu llimpiu ta enmarcada nuna estratexa p'afalar el reciclaxe que les normatives nacionales y europees esixen. Dixebrar les borrafes va ser  d'obligáu complimientu al curtiu plazu, pudiendo ser sancionaos tanto los conceyos como los ciudadanos que nun lo faigan.

Les obres, qu'algamen l'ecuador de la so execución, son financiaes pol Consorciu nel marcu del Plan d'Ampliación y Modernización de la Rede de Puntos Llimpios d'Asturies, aprobáu en 2005 pola xunta de gobiernu de la entidá.

El terrén pa la construcción del nuevu puntu llimpiu de Samartín del Rei Aurelio foi cedíu pa esti usu a Cogersa pol Conceyu. Tien una superficie total de 8.112 metros cuadraos y tien accesu directu dende la carretera AS-337.

El proyectu del puntu llimpiu considera dos plataformes onde asitiar los contenedores de gran tamañu pa borrafes avolumaes, como vexetales, muebles, chatarres o escombrios; y una marquesina p'allugar dientro los recipientes pa borrafes especiales de la casa (restos potencialmente tóxicos como aceites, fluorescentes, piles y bateríes, restos de pintures y disolventes, etc.).

Amás, va construyise un edificiu pequeñu de servicios onde van tar allugaos la oficina d'atención al públicu, l'almacén, los baños y los vestuarios de los emplegaos. Tamién va tar dotáu d'una báscula de 40 tonelaes de capacidá.