06.10.21. El Patronatu Municipal de Samartín del Rei Aurelio va destinar 90.000 euros a inversiones n'instalaciones y material deportivo, mesmo qu'a subvenciones a entidaes deportives y deportistes, que se van materializar enantes de final d'añu.

Del total, 61.000 aprobáronse güei por unanimidá de tolos grupos políticos nel plenu estraordinariu. Los 29.000 euros restantes yá se conseñaron per mediu de tresferencies de creitu.

En concreto, va intervenise na reposición de material y maquinaries nos ximnasios, na instalación d'una lona de separación nel polideportivu Blimea que permita amortizar l'usu, na igua de porteríes n'instalaciones deportives esteriores o na renovación de les redes de cierre de les canches descubiertes de L'Entregu y Blimea. Tamién se va actuar na reparación de la cancha'l Prau Molín y la cancha Piñera.

Del total del presupuestu, 12.000 euros van reservase pa la concesión de subvenciones a entidaes deportives y deportistes, recuperando d'esta manera unes ayudes ordinaries de carácter añal que l'añu pasáu nun se pudieron convocar pol mor de l'andada del COVID19.

Per otru llau, dende l'Ayuntamientu trabáyase pa que, o bien vía presupuestos o sinón per mediu d'una modificación presupuestaria, s'habilite una partida económica que permita llicitar la xestión y el mantenimientu de la piscina col oxetivu de reabrila. Esti procedimientu enmárcase nel procesu abiertu pa la disolución del Patronatu Municipal de Deportes, polo que toles xestiones en manes d'esti órganu tienen que se dir tresfiriendo a l'Alministración Local.