SMRA. 19.11.21. L'Ayuntamientu de Samartín del Rei Aurelio, Conceyu Amigu de la Infancia, súmase a les celebraciones del Día Universal polos Derechos de la Infancia, que se conmemora'l 20 de payares, con un espectáculu de teatru familiar y un taller de stop motion pensáu pal alumnáu d'Educación Primaria. Dambos con carácter gratuitu. 

Riquete el del copete ye l'espectáculu escoyíu pa la ocasión. Vien de mano de la compañía Higiénico Papel, ta dirixíu pa nenos y nenes d’a partir de 5 años y va representase mañana sábadu a les 19 hores nel Teatru Municipal.

Pela so parte, el taller de stop motion, impartíu por Beatriz Navarrete Santomé, va desarrollase en dos sesiones, los díes 25 y 26 de payares ente les 17:00 y les 19:00, na Casa la Mocedá en Sotrondio. El taller recibióse con gran interés y yá se cubrieron toles places, de toes maneres, almítense inscripciones pa la llista d’espera por si hubiere cancelaciones.

“Esti añu, pol mor de la pandemia, por una cuestión de prevención, optemos por sustituir el tradicional plenu infantil por dos actividaes culturales y d’ociu que respuendan a los intereses de la infancia, amás yá tamos trabayando nos conteníos del programa que vamos desarrollar en Navidá”, adelantó la Conceyala de Mocedá, Cintia Ordoñez..