SMRA. 03.09.21. La Conceyalía de Cultura reabrió la Oficina de Normalización Llingüística na Casona del Bravial, en Blimea, al traviés d’una subvención concedida pol Gobiernu del Principáu d’Asturies. El centru va funcionar llunes, martes, miércoles y vienres n’horariu de mañana, y xueves, n’horariu de tarde, hasta final d’añu.

La finalidá d’esta oficina ye la promoción y normalización del usu de la llingua asturiana dende l’Alministración Local en tolos ámbitos posibles: cultural, educativu o social desarrollando actividaes d’interés xeneral y utilizando tolos recursos y ferramientes posibles.

Recupérase d’esta manera un serviciu fundamental dientro l’área de Cultura que permitió realizar bien d’actividaes de promoción del asturianu nos últimos años.

Presentaciones, charres, esposiciones, collaboraciones con asociaciones del conceyu, ellaboración de documentos n’asturianu o presencia nes redes sociales son dalgunes de les actividaes que se van llevar dende la Oficina de Normalización Llingüística na Casona del Bravial. L’atención al públicu va facese con cita previa nel teléfonu 985 65 61 10.