22.12.21 Samartín del Rei Aurelio acueye'l domingu 2 de xineru una carrera solidaria p'adquirir xuguetes, baxo la denominación “Ellos son los Reis Magos”, que se van repartir al través de Cruz Bermeya Altu Nalón ente nenos y nenes de families vulnerables del conceyu. La iniciativa promuévela David Fernández García, un mozu de L'Entregu, per  mediu de la entidá Enjoy Sports.

La competición con salida y meta na plazoleta la ilesia, a les 11:30 hores, va percorrer la localidá con un trazáu de 5 kilómetros con poca dificultá; de toes maneres ta la posibilidá de facer un circuitu alternativu de 2 kilómetros p'aquelles persones que quieran realizar la prueba caminando.

Pa la competición establécense dos categoríes, masculina y femenina, con premiu pa los/es trés primeros/es clasificaos/es en cada sección. El preciu de la inscripción, mesmo pa la carrera que pa la marcha, ye de 4 euros más la entrega d'un xuguete nuevu que se pue entregar el mesmu día de la prueba o anantes, poniéndose en contactu cola organización.

Les persones que quieran participar puen inscribise yá nel portal web cronoempate na dirección https://www.empa-t.com/ Nel casu los/es menores de 12 años habrán dir acompañaos/es de padre, madre o tutor llegal.