14.10.21. El V Festival de Cortometrajes de San Martín del Rey Aurelio recibió a concursu un total de 887 curtios veníos de 35 países del mundu. Esta nueva edición va celebrase del 23 d’ochobre al 6 de payares. Proyectaránse les obres seleccionaes a concursu y amás van celebrase delles secciones paraleles complementaries que se recuperen y potencien en pasando les restricciones de l’andada.

“Otra vuelta rexistremos una alta participación de curtios de variedá de xéneros; profesionales y amateurs; d’Europa, Asia y América, ente los que figuren tamién curtios asturianos. Estos últimos cuenten con una sección específica nel festival, cola que buscamos potenciar y dar visibilidá a la producción cinematográfica n’Asturies”, argumentó la conceyala de Cultura, María Alonso.

La edición d’esti añu -añadió la edil- “recupera secciones complementaries al certame que na edición pasada, pol mor de l’andada de la COVID-19, nun se pudieron celebrar. Polo tanto, aumentemos y fomentemos la ufierta cultural de la programación del festival”. 

Un xuráu espertu escoyó los meyores curtiumetraxes que van competir na Sección Oficial y la Sección Cortos Asturianos pol gallardón al meyor trabayu presentáu, que se van premiar con 1.000 y 400 euros. Amás hai qu’añadir un premiu a la meyor interpretación, dotáu con 600 euros.

La inauguración del festival va celebrase’l sábadu 23 d’ochobre cola proyección de los 9 curtios asturianos finalistes nos Cines Artesiete Nalón. Van facese dos sesiones, la primera a les 18 hores y la segunda a les 20:15 hores. Pela so parte, los 20 curtiumetraxes seleccionaos de la Sección Oficial van proyectase’l del martes 26 al vienres 29, nes mesmes sales cinematográfiques, a les 19 hores.

“La mayoría de curtios de la Sección Oficial que se van proyectar son españoles, pero ente los finalistes tamién figuren obres veníes de Méxicu, Irlanda, Turquía y Estaos Uníos”, detalló Alonso.

Cinesan cuenta, per otra parte, con delles secciones paraleles que recuperen protagonismu nesta edición. “Estaya temática”, baxo la denominación esti añu de “Ajedrez...Silencio, se juega”, dedícase a les películes con un argumentu que xira alredor del axedrez. Van proyectase los llargumetraxes “Jaque al asesino”, “El caso Fisher” y “La defensa de Luhzin”.

Nel apartáu “Efemérides”, el festival va homenaxar a obres cinematográfiques de la historia'l cine como “El chico”, “El cartero llama dos veces”, “Escalofrío en la noche”o “Fargo”.

El públicu infantil y xuvenil tendrá’l so espaciu nel festival coles secciones “Cinesan Infantil” y “Cinesan Halloween”, nes que se van poner les películes “La Familia Adams” y “Venom 2”.

Per otru llau, el festival programa otres actividaes culturales y formatives dientro l’apartáu “Off Cinesan”. Nesta ocasión ta prevista la celebración d’un taller d’averamientu al procesu audiovisual, el 30 d’ochobre na Casa la Mocedá; y l’apertura de la esposición “Cine en Blanco y Negro”, en collaboración col Centro de Creación Escénica Carlos Álvarez Novoa.

La gala de clausura del festival, que va conducir en clave d’humor el cómicu Alberto Rodríguez, va celebrase’l 6 de noviembre a les 19 hores nel Teatru Municipal y nella van proyectase los curtiumetraxes ganadores.

Consulta la PROGRAMACIÓN