SMRA. 21.11.21. El Taller d’Empléu de Samartín del Rei Aurelio presentó la campaña Chimpa2vida pal reciclaxe de teléfonos móviles y asina collaborar na financiación de proyectos educativos de rescate de nenos y nenes de les mines d’El Congo, mesmo que p’apadrinar chimpancés y cuidar el so desarrollu nel país africanu. La iniciativa enmárcase na Selmana Europea de la Prevención de Residuos, que n’Asturies coordina Cogersa.

Pa la recoyida de los teléfonos, que se va facer ente’l 25 de payares y el 3 d’avientu, afayáronse 30 puntos de recoyida en distintos equipamientos públicos del conceyu, como escueles, institutos, telecentros, biblioteques o centros sociales, amás d’en dellos comercios, onde se colocaron urnes reciclaes.

Los móviles que se recueyan mandaránse a la fundación Jane Goodall pa reciclalos. La recaudación que se consiga va destinase a los programes educativos con nenos y nenes rescataes de la esplotación llaboral nes mines y al cuidáu y protección de chimpancés.

Con esta iniciativa búscase sesnsibilizar a la ciudadanía sobre l’impactu que’l consumu de móviles tien nel mediu ambiente y sobre les consecuencies que la estracción del coltán de les mines xenera na esplotación infantil, na supervivencia de los chimpancés nel so hábitat natural y nos conflictos bélicos d’El Congo.

Foi l’alumnáu de los módulos de los certificaos de Llimpieza d’Espacios Abiertos y Dinamización del Tiempu Llibre quien participó directamente nel desarrollu d’esta campaña.