SMRA. 19.10.21. Samartín del Rei Aurelio va face-y un homenaxe a la figura del astrofísicu Onofre Rojo Asenjo'l próximu vienres 22 d'ochobre con un actu nel Aula Cultural La Plaza a les 18:00 hores. Nél va facese oficial la concesión del nome del científicu al centru cultural descubriendo una placa conmemorativa. La distinción aprobóse por unanimidá nel plenu de marzu a petición de l'Asociación de Vecinos de San Martín de Sotrondio. 

L'actu que promovieron l'Ayuntamientu y l'asociación vecinal cola collaboración de la Universidá d'Uviéu va presidilu l'alcalde de Samartín, José Ángel Álvarez "Quirós". Nél Ana María Uribelarrea va englosar la figura del célebre profesor y investigador.

Natural de Samartín y residente en Venezuela, sobresalió como científicu nel campu la física y tamién como profesor, investigador y escritor de publicaciones estremaes, lo que-y valió pa consiguir el reconocimientu públicu y la concesión de delles distinciones a lo llargo la so vida.

Onofre Rojo, de 98 años d'edá, nació en Lloreo y crióse en La Cabaña. Estudió na academia de Juan José Calvo Miguel y depués emigró a Latinoamérica. Exerció como profesor y director en delles universidaes, publicó munches obres y recibió numberosos premios pol so papel destacáu nos estudios de la física molecular, atómica y nuclear.

Enantes de la ceremonia, ta previsto la celebración de dos conferencies nel Aula Cultural a les 19 hores. La primera va ser mañana miércoles, baxo'l títulu "Explorando las fronteras la física de partículas con el LHC", a cargu de Santiago Folgueras, profesor de la Universidá d'Uviéu.

La segunda charla, "Historia de la exploración espacial", de mano del caderalgu de la Universidá d'Uviéu Luigi Toffolatti, va celebrase'l xueves 21 d'ochobre.

Con esta distinción qu'agora facemos oficial "damos respuesta a una petición vecinal pa distinguir a un estudiosu nel campu la física con una trayectoria profesional brillante y enllena d'ésitos que ta consideráu toa una autoridá a nivel internacional", valoró la conceyala de Cultura, María Alonso. Esti reconocimientu "va permitir, amás del merecíu tributu, averar a la población del conceyu'l perfil d'Onofre Rojo y que'l so exemplu como científicu sirva de referente", añadió.