19.10.21. L'Ayuntamientu de Samartín del Rei Aurelio, per mediu de la Conceyalía de Mocedá, súmase esti añu a la celebración de la Selmana la Ciencia n'Asturies, que va tener llugar del 8 al 21 de payares, con un programa d'actividaes que se publicará nesta web nos próximos díes.

En Samartín la celebración va desarrollase del 2 al 15 de payares, coordinada dende los Centros de Dinamización Tecnolóxica (CDTL) y la Casa la Mocedá.

La Selmana la Ciencia tien como finalidá averar los conocimientos científicos y la tecnoloxía al públicu en xeneral y, en particular a la xente más mozo, d'un mou amenu pa que seya entretenío y atractivo, al empar que senciello, pa favorecer la comprensión ensin grandes dificultaes.

Nesta edición, ta previsto que más d'un millar de científicos asociaos a la Universidá d'Uviéu participen nos actos que se van entamar nos distintos conceyos asturianos col propósitu de llegar a un públicu cada vez más numberosu.