19.11.18. El Director Xeneral de Comerciu, Julio Zapico, y l'alcalde de Samartín del Rei Aurelio, Enrique Fernández, acompañaron esta mañana a l'asociación d'empresarios y comerciantes ECOSAM na rueda de prensa de presentación de la tarxeta de puntos "Villes asturianes km 0" que foi llantada en 35 establecimientos del conceyu ente comercios y locales hosteleros y de la que yá hai distribuyíes 950 unidaes.

L'alcalde de San Martín valoró bien positivamente la puesta en marcha d'esta iniciativa que se suma a otres col envís de dar vida y afalar el comerciu y qu'ECOSAM entama mientres tol añu, dende va diez cuando se punxo en marcha'l Plan Estratéxicu del Comerciu Local, que cunta col sofitu económicu y la collaboración institucional del Conceyu.

El Director Xeneral de Comerciu, pela so parte, aplaudió igualmente esti nuevu proyectu de los comerciantes del conceyu y valoró'l sector comerciu nel so conxuntu na rexón, por ser xenerador d'empléu, empreses, ciudá y servicios de calidá. Coles mesmes, cuantificó en 12.189 el númberu de comercios nel país asturianu, que xeneren 64.000 puestos de trabayu, de los cualos 17.500 son autónomos y el restu, asalariaos. Amás, calculó en 10.500.000 euros los ingresos que xeneró'l comerciu n'Asturies en 2017.

La tarxeta de puntos de Samartín ye una ferramienta que dexa a los consumidores aportar a productos o servicios gratuitos nel so comerciu de proximidá una vegada consiguíu un saldu mínimu xeneráu por una riestra compres nun mesmu local. N'España son pocos los conceyos pequeños, según ECOSAM, qu'ufierten un beneficiu d'esta mena.