SMRA. 23.03.21. El Centru d'Alcuentros y Creatividá de L'Entregu tá esbilláu ente los ocho proyectos finalistes que opten al premiu de la V Conferencia Estatal de la Cultura pal reconocimientu d'esperiencies y modelos de bones práctiques na xestión cultural al rodiu de los oxetivos de desendolque sostenible. La candidatura presentao contempla l'actividá propio del equipamientu cultural nel contestu de desendolque y tresformación de la llocalidá onde s'asitia, nos años caberos.

Allugáu na antigua serrería d'Hunosa n'El Trabanquín, el Centru d'Alcuentros y Creatividá desendolcó dende la so puesta en marcha "diferentes acciones multidisciplinares nel ámbitu de la cultura, con más de 50.000 visitantes nes sos actividades y más de 450.000 visitantes acumulaos colos sos trabayos en delles ciudaes d'España", según se recueye na propuesta presentada a la convocatoria.

La presentación de los proyectos esbillaos va ser el miércoles 24 de marzu nel Auditoriu del Ministeriu de Cultura, en Madrid.