Una veintena de bares despacharán cebolles del 26 al 30 de noviembre en las fiestas gastronómicas - ayto-sanmartindelreyaurelio
Una ventena bares van despachar cebolles del 26 al 30 de payares nes fiestes gastronómiques
SMRA. 22.11.21. Samartín del Rei Aurelio va celebrar del 26 al 30 de payares les Fiestes Gastronómiques de Les Cebolles Rellenes, declaraes d’Interés Turísticu pol Principáu d’Asturies, nuna ventena bares, sidreríes y restoranes del llugar y la rodiada.
La hostelería local ofrecerá nel almuerzu y na cena’l menú tradicional compuestu poles clásiques cebolles rellenes de bonitu, una ración de callos y les casadielles, too ello acompañao con vinu o sidra. El menú completu, incluyendo la bebida, oscila pente los 25 y los 27 euros, mientres que la ración individual de cebolles ronda los 14 euros, dependiendo de cada establecimientu.
Pal conceyu les xornaes gastronómiques son un reclamu turísticu que favorez la economía local, mesmo hostelera que comercial, y ye tamién un eventu de dinamización de l’actividá social y cultural.
Les xornaes gastronómiques cuenten con una programación festiva paralela a cargu l’Asociación de Comerciantes y Hosteleros El Entrego Activo y la collaboración del Ayuntamientu. El vienres 26, Marcos Torre, director del coru San Andrés Sergio Domingo, va dar el pregón a les 19 hores nel Teatru Municipal en representación de l’agrupación coral que recibirá como distintición la Insignia de Plata de Les Cebolles, en reconocimientu del so llabor como embaxadores culturales de Samartín y pol compromisu cola actividá sociocultural en conceyu.
Nel mesmu actu, El Entrego Activo va entrega-y el gallardón La Cebolla d’Oro al alumnáu que fizo’l sestu cursu d’Educación Primaria del colexu Sagrada Familia nel cursu 2020-2021 pola campaña solidaria Compra en el pueblín, ayuda al vecín, d’apoyu al sector comercial pol mor de la crisis de la pandemia.
El sábadu 27 de payares, el Teatru Municipal va acoyer la obra El último en morir que apague la luz, gratis a les 19 hores, a cargu de la compañía Con Alevosía Teatro; amás d’un taller vespertín de minipinchos gastronómicos pa nenos y nenes nel centru comercial Valle del Nalón. El domingu, pasucáis de la Banda Música de Samartín del Rei Aurelio, a les 13:00 hores. En casu de lluvia va treslladase al quioscu la música del parque..
El martes 30 de payares, fiesta local en L’Entregu, misa n’honor a San Andrés na iglesia parroquial, con actuación del coru San Andrés Sergio Domingo, y pasucáis al ritmu les panderetes y les gaites del grupu etnográficu y de baille El Esperteyu.