SMRA. 16.07.21. La Conceyalía de Mocedá presentó'l programa d'ociu infantil "Veranin en Samartín" pa los meses de branu de xunetu y agostu, empobináu pa neños y neñes de 6 a 12 años, qu'entama la celebración de cuatro campamentos urbanos de día, sesiones de cine y talleres y actividaes d'ociu y tiempu llibre.

 Los "Campamentos Urbanos Blimea-Sotrondio" van celebrase selmanalmente del 19 al 23 de xunetu y del 2 al 6 d'agostu, con sede na Casa de la Xuventú; mientres que los "Campamentos Urbanos L'Entregu" van tener llugar del 26 al 30 de xunetu y del 9 al 13 d'agostu, con sede na Casa la Cultura de L'Entregu.

Los campamentos van desendolcase n'horariu de 10 a 14 hores, con un programa de actividaes llúdiques estremaes, al cargu de profesionales n'animación infantil, que se va desendolcar al alire llibre y nes diferentes sedes, con munchu procuru pa cumplir les midíes de prevención y protección frente a la covid.

La inscripción ye gratuita y puede facese dende'l llunes 21 de xunu, na  Casa de la Xuventú, a traviés de los teléfonos985 67 01 22 y 670 05 05 38 (llamada y whatsapp); con places llimitaes que se van cubrir per orde d'inscripción.

Los campamentos son una alternativa d'ociu braniegu perinteresante y prestosa pa los neños y neñes de Samartín qu'al mesmu tiempu contribúi a facilitar la conciliación llaboral de les families.

Arriendes de los campamentos urbanos, "Veranín en Samartín" contempla una Programación de Cine de Fin de Cursu pa los díes 29 de xunu y 1 de xunetu, al mediudía, nel Teatru Municipal, con una sesión pal públicu infantil y otra pal xuvenil, respectivamente.

La tercer actividá del programa de veranu va consistir n'Actividaes y Talleres d'Ociu y Tiempu Llibre que se van organizar demientres la primer quincena de xunetu, nunes feches entá por determinar. Realidá aumentao, espaciu virtual y videoxuegos de movimientu, escape room y robótica sphero son les temátiques de les actividaes previstes, que van desendolcase en dependencies municipales.