La Mesa los Moros

Conocíu como’l dolmen de la Mesa los Moros, representa l’elementu más destacáu de la necrópolis tumular neolítica –catalogada na Carta Arqueolóxica d’Asturies– que s’alluga nel cordal que divide los valles de La Güeria Carrocera y Blimea, nel altu L’Españal. 

Cerca'l dolmen topóse en 2016 un túmulu inéditu de 6000 años d’antigüedá, nel qu’hai dos cámares funeraries de los milenios IV y III e.C respectivamente, consideráu’l túmulu neolíticu de mayor dimensión de toa Asturies. 

Les escavaciones que descubrieron esti patrimoniu arqueolóxicu tienen como oxetivu rematar nun proyectu museísticu y la exhibición temporal del yacimientu al públicu.

¿Cómo llegar hasta’l dolmen? Accesu rodao pela carretera SM-7 hasta’l nucleu La Casilla con posibilidá d’aparcar el vehículu nos depósitos d’agua de Bimenes. El restu del trayectu, alredor de 1,5 km, hai que lu facer a pie o en coche touterrén.

Esteles de los Cuetos

Los Cuetos son trés salientes d’un estratu d’arenisca que baxa de norte a sur dende lo cimero’l cordal que corona Blimea pela derecha del Nalón en dirección a La Teyera. Atópase cerca del que se conoz como’l Picu La Muezca, na rodiada del Colláu o llanada d’El Españal, onde s’alcuentra una estación prehistórica con raigaños dolménicos y grabaos rupestres esquemáticos.

Les esteles atópense ente los materiales de los sepulcros megalíticos yá esbarrumbaos, al suroeste del cuetu más meridional. Anque de mano nun son fáciles d’alvertir polo tosques que son y por tar ente piedres de munchos tamaños, llegaron a identificase trés.

Amás d’estes trés esteles hai tamién otra piedra tallada en parte, de dimensiones un poco mayores y forma ovoidal. Hai dudes a la de clasificala como estela.

Nun se sabe si estes pieces pertenecíen namás a un sepulcru o a dellos.