Ye'l Presidente de la Corporación [art. 21 de la Llei 7/1985, Reguladora de les Bases del Réxime Local (LBRL)]. Tien, ente otres, les siguientes atribuciones:

• Dirixir el gobiernu y l'alministración municipal.

• Representar al Ayuntamientu.

• Convocar y presidir les sesiones del Plenu, nun siendo los supuestos previstos nesta llei y na llexislación electoral xeneral, de la Xunta de Gobiernu Local, y de cualesquier otru órganu municipal cuando asina s'estableza en disposición llegal o reglamentaria, y decidir los empates con votu de calidá.

• Dirixir, inspeccionar y impulsar los servicios y obres municipales.

• Dictar bandos.

• El desarrollu de la xestión económica d'acuerdu col Presupuestu aprobáu, disponer gastos dientro los límites de la so competencia, concertar operaciones de creitu, ordenar pagos y solventar cuentes, too ello dientro de los limites llegalmente establecíos.

• Les competencies como órganu de contratación no tocante a los contratos d'obres; de suministru y de servicios; los contratos de concesión d'obres; los contratos de concesión de servicios y los contratos alministrativos especiales, cuando'l valor estimáu nun supere'l 10 por cientu de los recursos ordinarios del presupuestu nin, en cualesquier casu, la cuantía de seis millones d'euros, incluíos los de carácter pluriañal cuando la duración nun seya superior a cuatro años, prórrogues eventuales incluíes siempre que l'importe acumuláu de toles añalidaes nun supere nin el porcentaxe indicáu, referíu a los recursos ordinarios del presupuestu del primer exerciciu, nin la cuantía señalada. Disposición Adicional 2ª de la Llei 9/2017, de 8 de payares de Contratos del Sector Públicu.

• La competencia pa la celebración de los contratos privaos, mesmo que l'axudicación de concesiones sobre los bienes de les mesmes y l'adquisición de bienes inmuebles y derechos suxetos a la llexislación patrimonial cuando'l presupuestu base de llicitación nun supere'l 10 por cientu de los recursos ordinarios del presupuestu nin l'importe de trés millones d'euros, mesmo que la tresferencia del patrimoniu, cuando'l valor nun supere'l porcentaxe nin la cuantía indicaos. Disposición Adicional 2ª de la Llei 9/2017, de 8 de payares, de Contratos del Sector Públicu.

• Aprobar la ufierta d'empléu público, d'acuerdu col Presupuestu y la plantiya aprobaos pol Plenu; aprobar les bases de les pruebes pa la selección del personal y pa los concursos de provisión de puestos de trabayu; y distribuir les retribuciones complementaries que nun seyan fixes y periódiques.

• Desempeñar la xefatura superior de tol personal y acordar el nomamientu y les sanciones, incluida la separación del serviciu de los/es funcionarios/es de la Corporación y el despidu del personal llaboral, dando cuenta al Plenu. Nestos dos últimos casos, na primer sesión que celebre. Esta atribución va entendese ensin perxuicu de lo dispuesto nos artículos 99.1 y 3 d'esta llei.

• Exercer la xefatura de la Policía Municipal.

• Les aprobaciones de los instrumentos de planiamientu de desarrollu del planiamientu xeneral non atribuíes de manera espresa al Plenu, mesmo que la de los instrumentos de xestión urbanística y la de los proyectos d'urbanización.

• L'exerciciu de les acciones xudiciales y alministratives y la defensa del ayuntamientu nes materies de la so competencia, hasta cuando les delegare n'otru órganu y, en casu d'urxencia, en materies de la competencia del Plenu, nesti supuestu dando cuenta a al Plenu na primer sesión que celebre pa ratificalo.

• La iniciativa pa proponer al Plenu la declaración de lesividá en materies de la competencia de l'Alcaldía.

• Adoptar personalmente, y baxo la so responsabilidá, en casu de catástrofe o de desgracies públiques o riesgu grave d'ellos/es, les midíes necesaries y adecuaes dando cuenta darréu al Plenu.

• Sancionar les faltes de desobediencia a la so autoridá o por infracción de les ordenances municipales, nun siendo nos casos en qu'esa facultá tea atribuida a otros órganos.

• L'aprobación de los proyectos d'obres y de servicios cuando seya competente pa la contratación o concesión y tean previstos en presupuestu.

• L'otorgamientu de les llicencies, nun siendo que les lleis sectoriales lo atribuyan de manera espresa al Plenu o a la Xunta de Gobiernu Local.

• Ordenar la publicación, execución y facer cumplir los acuerdos del Ayuntamientu.

• El nomamientu de los Tenientes d'Alcalde.

• Les demás que de manera espresa-y atribuyan les lleis y aquelles que la llexislación del Estáu o de les comunidaes autónomes-y asignen al conceyu y nun les atribuyan a otros órganos municipales.