Samartín del Rei Aurelio ye un conceyu con una tradición culinaria bien llarga que vien yá de finales de los años 60, lo que fai que cada seronda se celebren trés fiestes gastronómiques singulares declaraes Fiestes d’Interés Turísticu del Principáu d’Asturies: Los Nabos, el 11 de payares, en Sotrondio; Les Cebolles Rellenes, el 30 de payares, en L’Entregu; y Los Pimientos Rellenos, el 8 d’avientu, en Blimea.

Los trés platos puen saborgase nos principales restoranes y sidreríes del conceyu. Pues consultar ónde queden nel apartáu Ónde comer d’esta mesma web. Amás, sírvense acompañaos d’una ración de callos, de primer platu, y casadielles y fayuelos de postre, too ello acompañao con vinu o sidra. A estes fiestes de solera sumáronse otros trés eventos que xeneren interés y demanda per parte’l públicu, como son Samartín de les Tortielles, Samartín del Pinchu y Les Xornaes Gastronómiques del Gochu Asturcelta, qu’organiza l’Asociación de Comerciantes y Empresarios del conceyu (ECOSAM). 

Los Nabos Payares

El primer fin de selmana de payares, alredor del día 11, Sotrondio acueye la celebración de les fiestes gastronómiques de Los Nabos. Con elles arranquen les primeres xornaes gastronómiques de Samartín del Rei Aurelio, a les que siguen Les Cebolles Rellenes, en L’Entregu, en payares; y Los Pimientos, en Blimea, n’avientu.

La hostelería del llugar atropa nabos, el meyor compangu y carne de gochu de primera y cocínenlo adulces pa sirvir esti singular pote nabos acompañao de callos, de segundu; y casadielles, de postre.

Les Cebolles Rellenes Payares

Coincidiendo cola festividá de San Andrés, l’últimu fin de selmana de payares, celébrense tamién les Fiestes Gastronómiques de Les Cebolles Rellenes nel llugar de L’Entregu. Decenes de restoranes, bares y sidreríes sirven el menú, compuestu de cebolles rellenes de bonitu, una ración de callos y casadielles de postre, too ello acompañao del meyor vinu la rexón.

L’orixe d’esti platu tan sabrosu hai que-y lu atribuir a Aniceta Fueyo, más conocida como La Nina. En pasando la Guerra Civil, pel tiempu la Cuaresma, motivada poles llaceries y necesidaes apañó un platu de cebolles rellenes ellaboráu sobre un respiñáu con migayes de bonitu pa sirvir un almuerzu a dellos sacerdotes qu’acudieren al bar de La Llaguna. A partir d’esi momentu, les cocineres Aurora y Belarmina, del restorán La Conda, garraron el testigu de la ellaboración d’esti platu, qu’a poco y a poco foi estendiéndose hasta qu’algamó’l carácter de festividá gastronómica que conocemos anguaño.

Los Pimientos Avientu

Los Pimientos Rellenos celébrense en Blimea la primer selmana d’avientu, coincidiendo cola ponte la Constitución. Coloraos o verdes, rellenos de carne picao o bonitu, al fornu o a la cazuela... hai delles opciones pa preparar un platu mui ricu que se vien sirviendo nos bares y restoranes del llugar de magar los años 70. 

Los pimientos son, per orde cronolóxicu, la tercer fiesta gastronómica que se constituyó nel conceyu. Cuando en L’Entregu y Sotrondio se celebraben Les Cebolles y Los Nabos, la hostelería de Blimea apostó por estender los festexos gastronómicos hasta la localidá preparando un platu senciellu pero sabrosu, emplegando pa ello otru de los manxares de la güerta asturiana: los pimientos morrones o verdes, que lo mesmo que los otros platos, van acompañaos d’una ración de callos y unos fayuelos de postre.

Samartín del pinchu Ochobre

Una trentena locales celebren per tol conceyu l’eventu gastronómicu Samartín del Pinchu, con una ufierta gastronómica compuesta por pinchos y taquinos fechos con delicies de la mar y del monte, amás d'otres escelencies de la güerta asturiana. En cada edición edítense gastromapes colos platos y negocios que participen a mou de ruta gastronómica.

Samartín de les tortielles Marzu

La hostelería del conceyu celebra en marzu Samartín de les Tortielles, una cita gastronómica con xuráu y votación popular, que xira alredor de la célebre tortiella y que tien l’interés d’ofrecer tortielles orixinales y creatives feches con una montonera d’ingredientes: pulpu, oriciu, centollu, amasueles, muxones, gambes, bonitu, carne guisao, morciella matachana, carne picao, xamón, salchiches, setes, champiñones, calabacinos, pimientos del piquillo o quesu.

Espiches Marzu-Mayu

Ente los meses de marzu y mayu, les asociaciones del conceyu celebren les tradicionales espiches asturianes pelos pueblos del conceyu. Sidra nuevo que se toma ensin falta echalo y que ye la seña d’identidá d’estos festexos populares onde nun falten los pinchos de bacaláu, les empanaes o les tortielles de patata, amás de güevos cocíos, bígaros, centollos o andariques. El calendariu festivu pue cambiar d’un añu pa otru pero les celebraciones enmárquense siempre ente los meses de marzu y mayu. Cada asociación suel dexar un fin de selmana, ente dos y trés díes, pa la celebración de la fiesta, abierta a tol públicu.

La hostelería local tamién celebra espiches, pero nesti casu nun tán suxetes a nengún calendariu específicu como’l que regula les fiestes cuando son los colectivos vecinales los que les organicen. Nes sidreríes del conceyu les espiches empiecen en marzu y hailes hasta’l veranu.