El Conceyu de Samartín del Rei Aurelio, allúgase al sur de la zona central d’Asturies, un poco esviáu al este, no que se conoz como valles interiores o prelitoral, dientro del nomáu “ocho asturianu”, centru físicu y funcional de la rexón.

De contornu irregular, representa’l 0,53% de la superficie de la Comunidá Autónoma. Llenda pel norte con Siero, al noreste con Bimenes, al sur con Mieres, al oeste y noroeste con Llangréu y al sureste con Llaviana.

El conceyu estructúrase alredor d’una serie de valles y cordales que vierten les agües al Nalón, ríu que traviesa’l conceyu pela parte central siguiendo la dirección sureste-noroeste.

Nes zones llanes alcanza una altura sobre’l nivel de la mar d’alredor de 340 metros, llegando a pasar los 1000 metros nes cumes de les xerres que lu arrodien.

Presenta una configuración topográfica accidentada y de grandes contrastes fisiográficos de tipu apalachense. La divisoria fórmenla materiales resistentes (cuarcites, arenisques y calices compactes del paleozoicu), mentres que los valles s’escavaren sobre pizarres blandes del carboníferu.

El relieve configura un paisaxe de montes altos y valles fondos, cubierto de vexetación que-y da un aspectu suave y dibuxa guapos llugares onde disfrutar de la pesca o’l senderismu.