Los primeros nicios que mos indiquen que nel conceyu nuestru s’eplotaben yacimientos d’hulla daten de mediaos del sieglu XIX, anque s’utilizare un sistema artesanal y la producción fuere mínimo. Esto deduzse del fechu de que’l ferrocarril Xixón – Llaviana, puestu en funcionamentu en 1854, construyóse namás hasta La Felguera, teniendo qu’esperar 30 años más pa velu travesar el nuestru conceyu.

Nel añu 1854 rexístrase na Inspección de Minas del distrito de Asturias y Galicia la primer mina del conceyu, asitiada en La Vega (L’Entregu). Yá na década los 60 cuenta con un total de 38 yacimientos de carbón. El cume d’esti procesu ye l’apertura en 1885 del ramal del ferrocarril de Langreo ente L’Entregu y Llaviana, col establecimientu en Sotrondio d’una estación pa mercancíes y pasaxeros. De toes manera, na década de los 70, principalmente pol mor de la Guerra Carlista, la producción de carbón estancó y nun despegó hasta los años 80.

Esta coyuntura favorable diose, amás de por otres razones, pola política proteccionista de los gobiernos de la Restauración y por un procesu de concentración empresarial (a final del sieglu créense per esti procedimientu Duro Felguera y Minas de La Encarnada), que posibilitó la puesta en funcionamientu nel añu 1894 del ferrocarril qu’enllaza Soto Rei con L’Entregu. Como consecuencia, cuasique desapaez el clásicu obreru mixtu que combinaba los llabores mineros coles xeres agrícoles y ganaderes y surde’l verdaderu proletariu mineru con xornaes de doce a catorce hores, dacuando incluyendo los domingos, y que tien como únicu mediu de vida’l míseru xornal que recibe pol trabayu na mina (4 ó 5 pesetes al mes ganaba un picador en 1902).

Nos primeros quince años del sieglu XX la producción de carbón sigue aumentando. A ello contribuye, amás de les lleis proteccionistes de 1906 y 1907, el remate del puertu d’El Musel nel añu 1907. Por cuenta d’esta coyuntura económica prodúcense una serie de tresformaciones nel nuestru entornu.

Instalación de serviciu telefónicu na Casa Consistorial en 1901
Sustitución de la ponte de madera de La Escura por una de fierro, nel añu 1903

De magar 1919, n’acabando la Primer Guerra Mundial, escomienza una época de crisis qu’obliga a tolos Conceyos del valle a solicitar a la dictadura de Primo de Rivera una serie de midíes proteccionistes. Dalgunes d’elles aprobáronse, conque ente 1926 y 1930 la producción estabilizó otra vez y hasta aumentó llixeramente.

Na segunda quincena del sieglu XX van agotándose les capes de carbón que se puen esplotar per mediu de bocamines abiertes nes lladeres de les montañes y dapoco van furándose los pozos mineros qu’hai o hubo nesti conceyu: Mina’l Río, San Vicente, Sorriego, Entrego, La Encarná, La Piquera, El Sotón, La Cerezal, Sanamiés y Venturo. Va ser sobre too a partir del añu 1948 cuando s’inicie’l verdaderu apoxéu de la industria y de la minera en toa Asturies.

Nos años cincuenta xeneralízase l’usu de máquines (martiellos picadores), les locomotores eléctriques despacharon a les mules nel arrastre interior, creáronse nuevos llavaderos de carbón, y en 1959 inauguróse’l Parque de Carbones de Carrocera, qu’enllazaba coles bateríes de coque de La Felguera per mediu d’un teleféricu. La mano d’obra incrementaba tamién de forma importante y ye nesta década cuando se construyen les barriaes de San Juan (El Serrallo, en Sotrondio; la de Santa María, en Blimea, y la d’El Coto en L’Entregu, onde va vivir gran parte de los obreros de la minería veníos d’otres provincies españoles.

Dende 1960 la economía de les cuenques mineres asturianes viose sometío a una crisis llarga y dura que s’estiende hasta anguaño. Nun espaciu curtiu de tiempu presllen los pozos de L’Entregu, San Mamés, Cerezal, Sorriego y Venturo, baxando’l númberu de puestos de trabayu dende los 2.858 hasta los 193 trabayadores. Esti fenómenu vien determináu pola difícil competitividá del carbón frente a otres fontes d’enerxía, petroleu, gas, lletricidá, y hasta carbón americano, polaco o surafricano.

La reconversión del sector, en cumplimientu coles directrices europees, conllevó’l que foren presllando dapoco toles esplotaciones mineres hasta qu’a finales del añu 2015 Hunosa clausura’l pozu Sotón, la última de les mines de carbón que taba n’activo. Ye’l fin de la minería en conceyu.