Samartín

Esta ilesia débe-y l’advocación a San Martín de Tours. Allugada xunto al cementeriu del pueblu homónimu y construida sobre un templu d’orixe prerrománicu, conserva restos d’edificaciones anteriores, como unos modiyones (voladizos) bien interesantes con talla xeométrica nel borde’l teyáu. Nel interior alcontramos el Cristu del Socorro, al que’l saber popular-y atribuye una antigüedá d’ocho sieglos. Según la tradición, dientro’l templu afáyase, adosáu al muru izquierdu de la nave central, el sepulcru del Rei Aurelio, quintu rei de la Monarquía Asturiana. L’enterramientu del rei nesti llugar recuéyese na Crónica Sebastaniense. D'acuerdu cola tradición, el monarca tenía’l so palaciu residencial en Varaosa, cerca d’esta ilesia.

Santu Toribio de Cocañín  

Fecha casi de manera íntegra en mapostería, la so disposición estructural ye la típica de les ilesies rurales asturianes, cola entrada porticada y una espadaña con dos güeyos p’acoyer una pareya de campanes. Les puertes y ventanes tienen arcos de mediu puntu. Reconstruyóse en 1940. Hai pel conceyu munches capielles pequeñes con un carácter rural bien marcáu asemeyaes a esta, pensaes pa satisfacer los servicios relixosos de llugares pequeños, que se caractericen poles formes sencielles y polos materiales económicos emplegaos.

San Roque

S. XVII. Tien una inscripción de 1683. Asitiada na parroquia de Blimea, ye un bon exemplu de la economía de materiales y formes. Conserva’l pórticu de madera con teya árabe pel que tienen columnas pétrees que sirven de protección a la portada, compuesta por un arcu de mediu puntu sofitáu en xambes con ábacos impostaos. Ye asemeyada a la capiella de San José, en Peñateyera y a la de Sanamiés, en San Andrés.                                                                                        

San José

La capiella de San José, del sieglu XVII, allúgase na pedanía de Peñateyera. El vanu d’entrada configúrase per mediu d’un gran arcu carpanel. Sobre él hai una pequeña espadaña que fai tamién de campanariu.

Nuestra Señora de Villacedré

Data de finales del sieglu XIX y ta dedicada a la Virxe de la Cabeza, imaxen sedente de reminiscencies antigües. Tien un pórticu y una nave dividida en dos tramos, separada por un arcu de mediu puntu, nel esterior remata con una espadaña de namás un güeyu. Ye un santuariu de gran devoción que celebra la so fiesta’l primer domingu de xunetu.

San Antonio

Atópase al pie la carretera en Llantero. Remocicada, tien planta cuadrada con una nave única y teyáu a dos agües. D’equí salía, a principios del sieglu XX, una procesión qu’acababa no alto’l valle Villacedré, nel yá referíu santuariu de la Virxe de la Cabeza.

San Vicente

Nave rectangular en tramos separaos por arcu de mediu puntu y coronada con espadaña rematada en cruz.

Santu Ánxel de la Guarda

La so festividá celébrase l’últimu domingu d’agostu con una procesión que tresllada la imaxe del ánxel hasta’l prau de la fiesta, en L’Edráu.

Santu Cristu de la Paz

Allugada en Brañella, nel interior hai una imaxe mui guapa de Cristu crucificáu. La fiesta n’honor suyo celébrase’l segundu domignu de setiembre con una romería mui vistosa.

La Malena

Ye una capiella d’una nave con dos tramos con arcu de sepación. Ún de los elementos más antiguos ye la imaxe de la santa, a la que se celebra en xunu.