El Conceyu de Samartín del Rei Aurelio ta acabante d'abrir la convocatoria de sofitos a la garantía enerxética col enfotu d'ayudar a les persones con ingresos pequeños a facer frente a los gastos enerxéticos de lluz, gas o carbón. La novedá anguaño ye'l cambiu al alza del baremu d'ingresos máximos de la unidá familiar, d'acordies col númberu de miembros, col envís de llegar a un númberu mayor de beneficiarios.

Nesti sentíu, la llende d'ingresos pa una unidá de convivencia formada por una sola persona ye de 626,64 euros al mes, cuantía que va medrando a midida que crez en dos, trés, cuatro o cinco'l númberu de persones que tán empadronaes na mesma vivienda, hasta llegar a unos ingresos máximos de 1.138,24 euros pa les unidaes familiares onde viven seis o más persones.

El fin de les ayudes, pa les qu'hai aprobáu un presupuestu ensembre de 31.500 euros, ye facilitar el pagu de los suministros básicos d'una vivienda, como son lletricidá, gas, carbón, lleña o gasóil, según altes de suministros, a families monoparentales, paraos, pensionistes y otros colectivos con dificultaes especiales pa facer frente al pagu de los mesmos y asina evitar los riesgos dables d'esclusión social.

El plazu pa presentase a les ayudes, nes oficines de los Servicios Sociales de Sotrondio, L'Entregu o Blimea, ta abiertu dende'l llunes d'esta selmana hasta'l 31 d'ochobre.

• Bases Garantía Energética 2018. - pdf, 356 Kb