Esiste documentación qu'asitia'l so orixe ente los sieglos XIII y XIV. Remocicada en delles ocasiones, ye un bon exemplu d'arquitectura popular asturiana. Consta de planta rectangular distribuyida en dos altores. Ente les sos característiques principales destaca'l so doble accesu, según la so fachada frontera, que caltién restos d'un antiguu corredor y decoración xeométrica llabrada en dalgún de los sos sillares. Dende 2006 abelluga la Oficina de Normalización Llingüística de Samartín del Rei Aurelio.

OFICINA DE NORMALIZACIÓN LLINGÜÍSTICA DE SAMARTÍN DEL REI AURELIO

La Oficina de Normalización Llingüística de Samartín del Rei Aurelio, asitiada na Casona del Bravial en Blimea, tien como oxetivu principal facer que la llingua asturiana se convierta nun instrumentu de comunicación normal na vida social del conceyu.

Nun se trata cenciellamente d'un llabor promocional, esi ye solo'l mediu p'algamar lo que realmente interesa, que ye la normalización. Consiguir que l'asturianu tea presente al mesmu nivel que'l castellanu nel mayor númberu d'ámbitos dables: alministración, educación, lliteratura, toponimia, nueves teunoloxíes, hostelería, comerciu, etc.

¿Y pa qué-y val a un ciudadanu d'a pie una oficina de normalización?

Pues dirixite a nós pa facenos tou tipu de suxerencies con respeutu a la llingua asturiana o solicitar el nuestru asesoramientu pa la traducción de testos de toa mena. Amás, dende esta oficina llevamos tiempu trabayando xunto coles asociaciones y empreses privaes del conceyu, ufiertándo-yos un gabitu nos sos proyeutos tanto a nivel llingüísticu como alministrativu (tramitación de subvenciones, información sobre cursos, etc.)

Per otru llau, esta oficina ta inxertada dientro de la Rede de Normalización Llingüística nos Conceyos. La collaboración ente tolos servicios que la integren permite la ellaboración de materiales y campañes en xunto, lo que supón un trabayu n'equipu que favorez la posibilidá de sacar p'alantre proyeutos novedosos y orixinales que tengan una bona acoyida ente la población.

Amás d'estos proyeutos comunes, esta oficina desendolca otros de collecha propia, con unos conteníos específicos aplicaos de mou esclusivu al conceyu a la gueta de que la xente de Samartín del Rei Aurelio sienta la llingua asturiana tovía más suya. Pa eso trabayamos y por eso naguamos: facer que la llingua seya del pueblu, y el pueblu la identifique como suya y la emplegue ensin problema en cualquier ámbitu.

Señes:

Travesía de Goya 6

33960 Blimea

Tfnu: 985 65 61 10