CORAL SAN MARTÍN

La creación de la Coral San Martín de Sotrondio remóntase a principios del añu 1978, coincidiendo cola so presentación en público’l día 13 de mayu del mesmu añu nel Teatru Virginia de Sotrondio. La Coral compónenla 26 voces graves, y dende que se creó tien ofrecío cientos de conciertos, basaos nun estensu repertoriu de 130 obres, de les que 70 son temes asturianos, 35 d’otres rexones o nacionalidaes, mientres que'l restu son temes sacros y villancicos.

A lo llargo la so trayectoria tienen cantao na mayoría de pueblos, villes y ciudaes del Principáu d’Asturies y cuasique en toles comunidaes autónomes: Andalucía, Baleares, Canaries, les dos Castielles, Cataluña, Galicia, Madrid, Murica y el País Vascu. Fuera’l nuestru país actuaron en París, Nevers, Chautay, Bourges, La Machine, Foix o Saint-Girons.

Ente los sos trabayos discográficos destaca’l discu “Mineru lu quiero, madre” o “Un pasu más”.

Web: http://coralsanmartin.blogspot.com

BANDA DE GAITES REI AURELIO

La idea de formar una banda gaites en Sotrondio naz alredor del añu 1997 d’un grupu de xente mozo de la cuenca’l Nalón formao na escuela de música tradicional que’l fináu Manolo Quirós tenía en L’Entregu. La iniciativa tuvo mui bona acoyida en valle, nunos años nos que se taba estendiendo la formación de les bandes de gaites d’estilu escocés per tol centru d’Asturies, principalmente de mano del célebre gaiteru Hevia. Precisamente, veníos de la escuela d’Hevia fueron los primeros, y actuales, maestros de gaita y percusión de la banda de Sotrondio que, por unanimidá, decidió nomase Rei Aurelio, por da-y un nome non localista a la formación.

Na fiesta Les Cebolles Rellenes de 1998 constitúyese de manera formal la Banda de Gaites Rei Aurelio, integrada como un miembru más na sonada Bandona que dirixía Hevia, de la que formaben partes otres cuatro bandes más, llegando a xuntase hasta cien gaiteros nuna sola formación.

Los primeros pasos de la Banda de Gaites Rei Aurelio son relativamente modestos como grupu: actuaciones per tola xeografía asturiana y dalgún conciertu per tierres vecines de Galicia, Lleón o Zamora. Más a títulu individual, la banda aporta dellos de los sos miembros pa reforzar otres banda de gaites (pertenecientes a la Bandona), actuando per tola xeografía española y representando a Asturies nel Festival Intercélticu de Lorient (Bretaña). De les sos files tienen salío gaiteros que compitieron en festivales pa gaiteros solistes, como’l Remis Ovalle, n’Asturies, y el Macrimon, en Bretaña.

BANDA DE MÚSICA DE SAMARTIN DEL REI AURELIO

Nel añu 1931, el músicu Víctor Fernández “Carabín” y un grupu de colaboradores deciden formar la Banda de Música de San Martín del Rey Aurelio, presentándola al públicu con un desfile nel añu 1932. Col correr del tiempu la banda llegó a ser municipal, hasta que por dellos motivos se disuelve nel añu 1967.

En 1982 José Antonio Fernández González, fíu del fundador, cola collaboración del Conceyu, d’antiguos músicos y d’un grupu de colaboradores, recomponen l’agrupación musical baxo l’Asociación Musical de San Martín del Rey Aurelio, integrada na actualidá por más de 40 músicos y músiques.

Tienen na sede social una escuela de música: l’Academia Educando, gratuira, onde la Banda de Música pon clases de solféu y instrumentu a los/es futuros/es componentes de l’agrupación. Ye esti’l so mayor arguyu, y a ella tienen accesu tolos nenos, nenes y xente mozo del conceyu.

Web: http://bmsmra.googlepages.com/home

CORU SAN ANDRÉS SERGIO DOMINGO

Nel añu 1974 Arsenio Fernández y Guillermo García funden l’Ochote San Andrés, niciu del futuru Coro San Andrés. Los sos componente yeren: tenores 1ª, Guillermo García y José Manuel Casal; tenores 2ª, Arsenio Fernández y Julio Baragaño; barítonos, José Manuel Matilla y Avelino Mallo; baxos, Jorge Torres y Manuel Sanzo. Un añu más tarde, en 1975 decide ampliase’l númberu de voces y l’ochote pasa a ser coru.

Nel añu 1976, por mediación d’Arsenio Fernández Pérez “El Polenchu”, establezse una rellación d’amistá col intérprete Sergio Domingo, qu’empieza a supervisar los ensayos del coru hasta llograr un sello personal na interpretación.

El 28 de mayu de 1977 muerre Sergio Domingo, xusto’l día en que se-y ofrecía un homenaxe per parte’l Coro San Andrés. D’entós p’acá’l Coro San Andrés añade al so nome’l del célebre maestru, pasando a nomase Coro San Andrés “Sergio Domingo”.

El Coro San Andrés actúa per tola xeografía asturiana y tamién per fuera. Ente los sos trabayos discográficos destaquen: “La Suite Gijón”, de Sergio Domingo, y “Viva Asturias”.

Web: www.corosanandres.com