Viviendes

El fenómenu más importante no tocante al urbanismu y l’arquitectura del conceyu foi’l desarrollu de la minería a partir del últimu terciu del sieglu XIX. Les poblaciones principales –L’Entregu, Sotrondio y Blimea– fueron grandes nucleos mineros. La llegada masiva de mano d’obra traxo consigo la necesidá de construir viviendes y poblaos na rodiada de los pozos y, de magar los años 60, fuera del nucleu urbanu.

D’esta manera surden les barriaes mineres que se conserven anguaño –El Serrallo (Sotrondio), El Coto, La Vega, El Japón y San Vicente (L’Entregu). Nesti mesmu pueblu hai delles viviendes d’obreros mui interesantes, como les d’El Xardín, apegaes a los talleres de Santa Ana. Cinco edificios que reflexen la tipoloxía derivao de los modelos de casa pa trabayadores que se veníen construyendo n’Europa dende’l sieglu XIX. Pertenecíen a los/es trabayadores de Duru Felguera y asemeyábense a la tipoloxía de casa-xardín, esto ye, una tipoloxía privilexada dientro d’esti tipu de construcciones.

El desarrollu de la minería y la llegada masiva de families al conceyu motivaron la creación d’equipamientos sociales básicos, por exemplu, les escueles. Consérvense dellos exemplos d’esti tipu de construcciones, dalgunos d’ellos mui valiosos, como les escueles de Cocañín, llevantaes na primer década del sieglu XX. Ye una construcción mui peculiar, configurada como un bloque rectangular allargáu y con una disposición en dos ales: aules pa nenos y nenes arrodiando un cuerpu central que sirvía de distribuidor de cuartos de bañu, biblioteca etc. Fízose en mampostería y lladriyu pa encuadrar con vanos l’emplegu d’un arcu mistillineu mui vistosu. Anguaño’l local utilízase como centru social del pueblu.

Muséu de la Minería y la Industria

Inauguráu en marzu de 1994, allúgase en L’Entregu, na zona d’El Trabanquín, enriba les antigües escombreres del pozu San Vicente. Anque se proyectó en 1986, el muséu construyóse en 1993 y 1994, baxo la dirección del arquitectu José Ramón Fernández Tresguerres. L’edificiu configúrase alredor d’un cuerpu central de forma cilíndrica, onde abre la portada d’accesu como un vanu ampliu d’arcu de mediu puntu. La lluminaria pa esti cuerpu central combina la lluz cenital, que entra per unes cristaleres en teyáu, con unos vanos circulares qu’arrodien el volume pela parte cimera. Perriba del cuerpu sobresal la torre d’un castillete de mina que fai d’exa vertebradora de tol edificiu. Dos naves adosaes a esti volumen central agospien les distintes sales d’esposiciones. Los materiales emplegaos –formigón y cristal pa les ales llaterales y lladriyu pal cuerpu cilíndricu central- tán venceyaos de manera directa col mundu industrial y fabril.

Sierra d'El Trabanquín

Ye una nave que la empresa Hunosa llevantó en 1910 pa concentrar los trabayos de tratáu de la madera qu’utilizaben nes distintes esplotaciones mineres. Ye una de les primeres del valle del Nalón onde aparecen pilares fechos en celosía metálico roblonaos. L’edificiu sufrió delles tresformaciones, la más notable en 1938, cuando s’amplió con cuatro pórticos que se sumaron a los seis qu’había de mano. Hunosa rehabilitóla en 1989, siguiendo’l proyectu de los arquitectos Manuel y Enrique Hernández Sande. Anguaño agospia un centru d’alcuentros pa la creatividá.