CASES SOLARIEGUES

Nel conceyu de Samartín del Rei Aurelio conviven cola arquitectura más moderno delles cases y solares que pertenecieron a les grandes families asentaes en conceyu nos sieglos XVI y XVII.

Casa de los Fernández Miranda

Allugada nel barriu d’El Bravial, en Blimea, agospia’l Muséu de la Memoria y la Oficina de Normalización Llingüística. La documentación data l’orixe de la casa ente los sieglos XIII y XIV. Remocicada en delles ocasiones, ye un bon exemplu d’arquitectura popular asturiana. Tien planta rectangular, distribuida en dos altures. Ente les sos característiques principales destaca l’accesu doble, mesmo que la fachada frontal, que conserva restos d’un antiguu corredor y decoración xeométrico llabrao en dalgún de los sillares. Llámenla tamién la Casona del Bravial.

Casa de los García-Argüelles

Asitiada en Carrocera, la casa configúrase alredor d’un bloque macizu rectangular, tien la fachada principal situada nún de los llaos curtios del edificiu –dalgo atípico–. Divídese en dos pisos, con una distribución de vanos de carácter irregular, anque los del llau oeste, paralelu al camín, presenten un tamañu uniforme.

Conserva restos de piedra llabrao en xambes y dinteles en dalgunes de les munches puertes y ventanes, mesmo que nes esquines. 

Tamién foi propiedá de los Argüelles la capiella dedicada a Stu. Domingo que s’atopa na rodiada de la casa. Éntrase per un senciellu arcu de carpanel sobre pilastres de capitel imposta y una planta rectangular con cubierta abovedada. 

Casa d'Antonio Álvarez Muñiz

Tamién en Carrocera, cercana a la residencia de los Argüelles, atópase esta magnífica casa construida en 1899, como apaez grabao na rexa d’ún de los balcones de la fachada.

Ye una edificiación interesante que nació cola intención clara de combinar la función residencial cola de tienda d’ultramarinos, que s’alcontraba nel baxu y n’otros espacios anexos alredor d’un patiu. Estructurada en trés altures, utiliza los avances de la ciencia del momentu, como la columna de fundición, pa consiguir un espaciu interior y una altura mayor, anque nun renuncia a la tradicional muria de carga en tol perímetru.

La decoración ye propio d’edificios urbanos d’estilu eclécticu, sobre too nos encuadres de los vanos. Les ventanes sustitúyense por balcones elegantes con rexería orniamental.

Casa de los García Ciaño

Asítiase en La Cabezá, cerca Blimea. Anque vien apaeciendo nes fontes yá dende’l sieglu XVI (J. Gómez y G. de la Buelga), la edificación de la manera na que la conocemos na actualidá –magar que pasare per reformes periódiques– ye de la segunda metá del sieglu XVI. Tien dos altures con fachada al sur de forma apaisada y una torre cuadrada adosada nel llau este. Esta última nun conserva nengún rastru de la so antigüedá, yá que la modificaren cuando la edificación se convirtió en vivienda. La casa tien una portada con doble arcada de mediu puntu, constituida por grandes doveles. Los vanos del segundu pisu tienen una disposición ordenada, requisitu básicu nel estilu sobriu y clásicu al que se puede adscribir esta construcción. El material que s’utilizó pa los vanos foi sillar tallao, y pa les muries mampostería.

La casa nun presenta nengún elementu decorativu, yá que l’escudu que llucía de la familia García Riaño, col dragón amarráu a un árbol y dos castiellos, desapareció del centru de la fachada principal.