CASES TRADICIONALES

Constituíes alredor d’un conxuntu arquitectónicu tradicional formáu por una casa familar con horru o panera, a veces molín, llagar, cuadra o tenada, hai dellos exemplos nel conceyu.

La Güerta
La Güerta ye una casería que pertenez a la parroquia Cocañín, a cuatro kilómetros de L’Entregu, a la que se llega pela carretera AS-338 dirección Bimenes. Al llugar traviésalu la ruta senderista qu’aprovecha’l trazáu de la vía férrea que llevaba’l carbón de La Encarná a L’Entregu y el ríu Silvestre. Una canal qu’abastecía a dos molinos dispuestos n’escalera corta’l meandru d’esti. 

Esti conxuntu enmárcase dientro d’una unidá de producción mui bien cuidada qu’incluye dos cases col típicu corredor frente a les que llevanta l’horru.
 

Cocañín
Esta casería atópase a cinco kilómetros de L’Entregu, garrando la esviación hacia la izquierda que lleva a El Pullíu (na carretera que da a La Camperona). Tien una unidá de producción tradicional mui cuidada formada por una casa familiar con cuadra, panera y llagar.

San Vicente
Esta casería de la parroquia de San Andrés de Llinares allúgase nel llau derechu del Nalón. Na rodiada pueden apreciase dos horros modernos, l’edificiu del llavaderu públicu, fecháu en 1934, y un conxuntu de cases tradicionales.
 

Casa Rectoral de San Andrés de Llinares
Xunto a la desapaecida Ilesia de San Andrés consérvase la casa rectoral d’esta parroquia. La casa yá apaez documentada nel añu 1676, pero ye de xuru anterior. Tien una planta en forma d’ele con dos altures, la d’arriba tien un corredor de madera a lo llargo de tola fachada. L’usu agrícola que se-y dio, amás del puramente residencial, condiciona la estructura de la casa.