El patrimoniu etnográfico del conceyu ye ricu n’horros y paneres centenaries qu'apaecen espardíes per tol territoriu. En Sotrondio podemos topar horros n’El Rimaero, en San Frechoso y n’El Pontón. En L’Entregu hailos en La Revenga, xunto a la casería al pie del solar qu’ocupaba l’antigua ilesia parroquial de San Andrés.

Nel valle La Güeria afáyense delles construcciones en La Güerta –un conxuntu d’horru, casa y molín–, La Cabaña, Cocañín, El Pullíu o La Llonga. Nel llugar de Perabeles, nel valle Santa Bárbola, hai un conxuntu de cinco horros, decoraos con relieves en forma de roseta na puerta y con un arcu sobre ella. Hai tamién una panera en metá’l pueblu con dos de les cuatro puertes tallaes, esquines enterices y con decoración abondo.

Característiques

L’horru asturiano tien forma cuadrada y la panera forma rectangular, con unes dimensiones diverses, pudiendo establecese una media de 4x4 metros pa los unos y 8x6 metros pa les otres. Ta fecho en madera, polo xeneral de carbayu y castañal, yá qu’aguanta mui bien albintestate. Sofítase en cuatro pilares nomaos pegollos que son de madera o piedra, de forma troncopiramidal y d’una sola pieza.

La cubierta ye siempre de teya y a cuatro agües con aleros salientes, formaos por cuatro faldones iguales en forma de triángulu que rematen nun puntu o vértiz onde suel haber una piedra que lleva’l nome de comal/cumal/cumbrial. La panera, al ser allargada, tien les cuatro vertientes del teyáu iguales dos a dos y remata nuna arista horizontal. De toes maneres, los horros nun tienen siempre’l teyáu a cuatro agües, hailos a dos agües –anque nun son mui frecuentes¬– como’l que se conserva n’Arbixil. Los pilpayos y les mueles son de piedra, adoptando toes la forma cuadrangular o circular y los demás elementos de la cadarma: taces, talamera, tenobia, colondres o lliños, que son siempre de madera. 

Nel sieglu XVIII ensertóse-y al horru un corredor alredor d’él, un fechu que va empareyáu a la incorporación del cultivu de maíz que s’almacena colgao en corredor pa que cure.

La subidoria/subidera, cuando hai, ye de piedra, pero munches veces falta. Nestos casos suelen usase escaleres móviles o elementos añadíos: dalguna muria, dalgún llugar altu del camín...

L’orixe l’horru piénsase que ta nes invasiones qu’hubo nel segundu mileniu enantes de Cristu nel noroeste peninsular y que se promovió pol mor de los cambios nes técniques na sema y na collecha.

Despenses

Según Jovellanos, presenten munches ventayes: la resistencia al tiempu, la movilidá y facilidá de tresporte -al ser de madera dafechu-, ausencia d’humedá interior, bona ventilación y amás, yera inaccesible pa los royedores.

Tradicionalmente, horros y paneres tienen sío la despensa onde curaben y se conservaben los productos cárnicos y lácteos, onde se guardaben los frutos secos, les mazanes, les patates, el granu, etc. Nel esterior, colgaos de los gabitos, en corredor o na talamera, secaben los productos que lo necesitaben. Tamién yera habitual l’usu como dormitoriu ocasional, mesmo qu’utilizalos pa guardar l’arca y la ropa. El caramanchón yera’l sitiu ideal pa secar, mientres que l’espaciu inferior valía de tendeyón y yera onde se guardaba’l carru y los aperios.

Les coses cambiaren muncho y les viviendes actuales tienen unes condiciones mui distintes a les de va décades, polo que la función del horru viose mui modificada. De toes maneres, tovía anguaño conserva les dos funciones tradicionales: la de despensa y la d’almacén, non solo de productos alimenticios sinón de ferramienta, ropa y calzáu, muebles vieyos que yá nun s’usen, y n’hostelería, como dormitoriu.