La necesidá de moler los cereales pa facilitar el consumu tuvo en Samartín del Rei Aurelio una solución igual a la del restu d’Asturies, anque equí l’abondancia de ríos y regatos posibilitó una gran concentración de molinos d’agua. Por embargu, en dalgunos llugares queden restos de los primitivos molinos de rabil (tamién llamaos de sangre) que se movíen con fuerza animal o humano.

De los nomaos molinos de pisón consérvense trés exemplares nel conceyu: en La Sampedro, El Caleyu y Riocerezal, que tán en desusu. El molín de La Sampedro ta fechu en madera y tien la particularidá d’afayase embaxo un horru y cola tolva formando parte del corredor, d’esta manera’l cereal podía emburriase cómodo dende l’almacenamientu.

De los molinos d’agua, nel marcu del valle Santa Bárbola, consérvense el Molín de Veró, el Molín de Perabeles y el Molín de Salvadora, de 300 años d’antigüedá según la tradición popular, que funcionen de cuando en cuando pa moler el maíz con motivu de les visites turístiques a la zona.

El Molinón

Atópase na vaguada ente Perabeles y la Rebollá, a la vera’l ríu Santa Bárbola, yera propiedá de los veceros (comunal), lo que quier dicir que la construcción contratárenla dellos vecinos, que facíen un usu rotatoriu d’él.

Remocicóse por iniciativa vecinal en collaboración col Conceyu de Samartín del Rei Aurelio a finales del añu 2004 y volvió furrular en febreru de 2005. Según los vecinos que s’encargaron del remocique, tien una antigüedá de 300 años, anque ye imposible ofrecer una datación cronolóxica exacta yá que nun hai documentación conocío que recueya la so asistencia acullá del sieglu XIX.

La estructura tien una única estancia delimitada por cuatro muries de mampostería que llevanten en planta cuadrada y alluguen el mecanismu de moler. Nel esterior hai un vanu d’accesu llateral y un ventanucu na parte frontal. Embaxo d’él disponse un arcu de mediu puntu que da salida al agua que fai xirar el ruéndanu/rodédanu. Sobre ella disponse un teyáu a una agua.

Na parte posterior atópase’l cubu, cubiertu por llábanes de piedra. La muela ye la orixinal y recuperáronla los vecinos de la zona al empar que’l frayón y el restu de mecanismos cuando entamaren el procesu de restauración cola idea de recuperar un bien del patrimoniu etnográfico del conceyu consideráu de gran interés cultural.

Molín de Salvadora

Afayáu malapenes a cien metros d’El Molinón pero pela parte’l ríu que pertenez a La Rebollá, tuvo en funcionamientu hasta la segunda metá del sieglu XX, quedando depués en desusu. Ye un exemplu interesante de molín-vivienda compuestu de dos altures de planta rectangular remataes con un teyáu a dos agües. L’inferior taba pa les dependencies del molín, quedando’l superior reserváu como vivienda de los propietarios. Dende’l puntu vista arquitectónicu destaca’l corredor de madera de la fachada principal del edificiu. 

La forma característica la muela volandera y el frayón permítemos afirmar que’l molín tien, a lo menos, 200 años, anque la disposición actual del recintu ye asemeyada a la de les cases tradicionales asturianes del sieglu XIX. Por esta razón, ye probable que lu enantaren nesa época p’añadir les dependencies doméstiques. 

Yera un molín onde se practicaba la maquila, esto ye, los propietarios nun cobraben por usalu, sinón que garraben una parte proporcional de la fariña que molíen. Esta acción de cobrar n’especie nómase maquilar.

 Molín de Veró

El molín atópase na rodiada del pueblu de Veró. Restauráu por iniciativa vecinal ente los años 2002 y 2003. Podría tener una antigüedá d’alredor de 300 años, anque, como ye habitual, nun hai referencies conocíes que lo prueben. 

Conserva parte de la maquinaria orixinal, que mos puede sirvir pa pensar que la estimación cronolóxica podría estar bien encaminada. 

Estructúrase alredor d’una planta rectangular con una estancia única y teyáu a dos agües. Morfolóxicamente aseméyase al restu de molinos que se conserven nel valle, destacando sobre manera l’arcu de mediu puntu qu’alluga la salida del agua que fai xirar la muela volandera sobre’l frayón.

El tar nuna zona mui elevada del monte, condicionó en gran midía l’usu que se-y dio, yá que’l correr del agua que lu alimenta ye mui ruino y insuficiente en delles époques del añu.

Ye por ello polo que nos meses de mayu y avientu taba, polo xeneral, en desusu. Les característiques de dalgunes de les sos partes tamién se vieron afectaes por estes circunstancies vinculaes cola mengua del nivel d’agua, razón pola que’l cubu ye d’un tamañu mayor de lo normal, yá que puede almacenar más agua de lo necesario pa garantizar el funcionamientu del molín.

.