El Valle Santa Bárbola

El Valle Santa Bárbola fórmenlu dellos nucleos de población como La Cruz, Perabeles, Los Caleyos o La Colladiella, a los que se llega dende Sotrondio pela carretera AS-337 Sotrondio-Urbiés.

Pola diversidá y riqueza de la flora, con viesques de carbayos, castaños, fayes o abedurios amás de la conservación de los pastos y la fauna autóctono, con frangüesos, xabalinos o aves de rapiña, el valle de Santa Bárbola considérase, dende l’añu 2002, Paisaxe Protexíu xunto a otros territorios de los conceyos de Llaviana, Llangréu y Mieres.

A esti espaciu protexíu pue entrase a pie o en coche dende’l barriu d’El Pontón, en Sotrondio. Dende esti puntu los/es visitantes puen incorporase a la sienda que los/es va llevar hasta l’Altu La Colladiella a la vera’l ríu, siguiendo’l vieyu trazáu del ferrocarril mineru qu’en tiempos tresportaba carbón dende’l pozu mineru de La Cerezal hasta’l llavaderu de La Hullera.

Amás d’esta sienda verde, el Paisaxe Protexíu del Valle de Santa Bárbola tien otros munchos atractivos pa los/es turistes, como son los molinos d’agua de Veró, Salvadora o Perabeles, el pozu Cerezal, la bocamina’l prau Molín o’l monumentu al mineru de Santa Bárbola, amás d’horros, fontes y llavaderos esparcíos pel territoriu.

Ente les festividaes que se celebren nesti valle destaquen les fiestes d’El Pote, l’últimu fin de selmana d’agostu, y la festividá de Santa Bárbara, patrona los mineros, el 4 d’avientu.

Mas información sobre'l Paisaxe Protexíu de los Valles Mineros disponible nel portal turísticu del Principáu d'Asturies https://www.turismoasturias.es/descubre/naturaleza/espacios-protegidos/cuencas-mineras y más específico y detallao nel Portal de Naturaleza del Principáu d'Asturies: http://naturalezadeasturias.es/

Valle La Güeria

Anque nun forma parte del Paisaxe Protexíu, el valle La Güeria ye otru de los espacios naturales del conceyu que paga la pena conocer.

Peles sos lladeres baxa’l ríu Silvestre, afluente'l Nalón que desemboca cerquina Carrocera. Equí comienza lo que ye’l valle, al que se llega dende L’Entregu pela carretera AS-17, qu'une’l conceyu con Bimenes, o garrando’l ramal de l’AS-338 cola SI-12 hacia La Camperona.

En Carrocera pue visitase la casona solariega de los Argüelles. Ye una construcción que presenta la traza de les casones señoriales asturianes. Conserva restos de piedra llabrao nos marcos y dineteles, mesmo que viguería de castañu antiguo y sillarexu nes parees. Na mesma finca hai una panera, na que destaquen los pegollos de piedra llabraos y fitaos sobre murinos remataos en bon sillar. Hai tamién una capiella dedicada a Santo Domingo, con arcu carpanel y pilastres de capitel imposta y planta cuadrangular con cubierta abovedada.

El valle pue percorrese per una sienda que va pente l’antigua trinchera del ferrocarril mineru pela que baxaba’l carbón de les mines de La Encarná. La sienda va a la vera’l Nalón, pue facese en 45 minutos, ye poco pindia y facilina.

Esti percorríu pasa cerca del antiguu pozu Venturo d’Hunosa y d’un parque y una pista deportiva construyíos nos terrenos nos que s’afayaba l’antiguu llavaderu de carbón de les mines de La Encarná.

Más arriba atópase la ilesia parroquial de Nuestra Señora del Sagrado Corazón, a la que, según diz el grabáu, se-y punxo la primer piedra, en 1957. Yá en La Güeria hai un molín que forma parte d’un conxuntu de casa de piedra, cuadra y horru, formando la casería asturiana típica.

Dende esti puntu hasta La Encarná queden namás unos minutos a pie pa llegar a l’altu dende’l que s’acolumbren les muries de piedra llabrao sobre los que pasa la carretera, construíos pal trazáu de la llinia Samartín – Lieres – Xixón – El Musel, que nunca nun llegó a funcionar.